Santosh Trophy Final Round : Mizoram team-in Itanagar an pan

FIFA Santosh Trophy final round khel turin Mizoram chuan nimin khan Aizawl an chhuahsan a, ruahman dan chuan tukin zing hian inelna hmun Itanagar, Arunachal Pradesh an thleng ang.

2014 Santosh Trophy champion Mizoram hian kum 2018 hnuah a vawi khat nan final round an thleng leh chauh a; February 22, Ningani zan dar 7:00-ah Maharashtra nen match hmasa ber an khel dawn.

Mizoram hi champion lai Karnataka bakah Delhi, Manipur, Railways leh Maharashtra te nen group khatah an awm a, group khat aṭangin team paliin quaterfinal an lut dawn a ni.

Player an inthlak

Santosh Trophy-ah hian player hming 40 thehluh tur a ni a, chuta ṭang chuan group stage-a player hman tur player 22 thlan leh tur a ni. Final round-ah team-in player thlak a duh pawhin player hming 40 a thehluh tawh aṭang chauhin a thlak theih.

Kuminah erawh inelna kalphung an thlak hret. Final round hi nikum November thlaa khelh tawh tur a nih laiin kumin February-March ah daih khelh a ni ta zawk. FIFA president Gianni Infantino remchan hun nghah vang a ni.

Group stage leh final round inkarah January transfer a tla zep hman a, hei vang hian team zawng zawngin harsatna an tawk. AIFF-in inelna kalphung thlakin final round khel team-te chu team thlak hlawk a phal. Chutihrualin team danga group stage lo khel tawhte chu ziahluh theih an ni chuang lo.

Mizoram pawhin qualifying round aṭangin player 12 ngawt an thlak a, tlarhma lama awm player phei chu an thlak vek!

Player chungchang

Santosh Trophy group stage-a top scorer Lalkhawpuimawia'n club a hmu a; Laltlanzova, Lalthangliana (AB-a) leh Crespo Vanlalhriatpuia ten phai lamah club an hmuh avangin an tel thei tawh lo. Midfielder Johny Lalremruata leh forward Suanngaihmuana chu khup hliam vangin an inhnuhdawh a ṭul a, kawng na vangin Lalmawizuala telh a ni lo a, hriselna vang thoin Zonunmawia a tel tawh lo bawk.

Mizoram team-in January 10, Nilaini aṭangin training an ṭan a, hetih hunlai hian Mizoram Police chu All India Police Meet an khelh dawn avangin tel thei lo tura ngaih an ni bawk. Coaching staff-ten kil tina mi player an dap a; MPL-a che ṭha bakah phai lama khel player lo haw aṭangin player a thlang khawm a, SYS Football Academy (Lunglei) awm lai player thlenga koh an ni. Harsatna belhchhah turin rinrawl ni thei tur senior player zingah chhungkaw harsatna avanga kal thei lo an awm a, coaching staff-te tan ngaihtuah tur a tam hle.

Hetiang boruak karah hian Mizoram hian January 31, Nilainiah (transfer tawp ni) chuan team a din tawhah a inngai a, Aizawl FC nen friendly match khelh a ni. I League club hi striker vangin an buai ve tho. Lalrinzuala a inhliam bakah foreigner pahnih an lak tum zinga pakhat chauhin a rawn zawm a, an ziahluh player hi a chhawr tlak loh avangin Mizoram team aṭangin Lalhriatpuia an chhuhsak leh bawk.

February thlaah Mizoram tan chanchin lawmawm hriat tur a awm ve ta thung a, Police Meet an sawn avangin Mizoram Police chu Santosh Trophy khel tura phalsak an ni. February 8, Ningani aṭangin Police player parukten training an zawm ṭan a, coaching staff tan erawh a harsa dang a awm - an player thlansa paih a ngai leh thung.

Mizoram manager K. Lalenghluna chuan, "Football hi chu a nunrawng takzet. Player discipline ṭha, Mizoram tana theihtawp chhuah team aṭanga paih an ngai chu hrehawm tak a ni. Mahse, Mizoram tana ṭha ber turin thutlukna siam a ṭul a, tawnhriat nei player-te kan thlan a ṭul si avangin kan tih ngei a ngai si. Player-te leh an chhungte pawhin min hriatthiam ngei ka beisei," tiin Vanglaini a hrilh.

Chutihrualin Mizoram team an vanduai leh ta tho. February 16, Zirtawpni kha hming thehluh hun tawp a ni a; February 17, Inrinni khan Mizoram striker Lalnunzama chu Salem Veng nen friendly match khelh ṭumin a tlu sual a, a ke ruh a khi - final round a khelh theih a rinawm loh zawk.

Coach Anand leh Malsawma

Mizoramin Santosh Trophy khel turin thla khat chuang an inbuatsaih a, hemi hunchhung hian damlohna avangin assistant manager Lalzarzova chu kar khat chhung a inlan thei lo. Hemi hun chhung hian Santosh Trophy coaching staff-a vawi engemaw zat tel tawh Anand Gurung-a'n head coach Lalsangzuala Hmar a pui a, team tan a ṭangkai hle.

Goalkeeper bik training pe turin National Games-a Mizoram tana gold medal la tawh Lalmalsawma a rawn pen chhuak bawk a, player-te nen an inhriat ṭhat bawk avangin team boruak a ti nuam hle. Coach Lalsangzuala Hmar chuan, "Anand leh Malsawma ten min pui hi ka lawm takzet a, Mizoram tana an inpekna leh kan chunga an ṭhatna hi ka hre reng ang," tiin Vanglaini a hrilh.

Ngaihsaktu nei Mizoram

Mizoram team hi an inbuatsaih ngawrh ang chiahin thawpna pawh an dawng ṭha. MSSC hnuaia gym-a training phalsak an nih bakah MSSC Centre for Sports Science-ah Body Composition Analyser te hman phalsak an ni a, player-ten an dinhmun an hriatchian phah.

RNR Garments, Mission Venghtlangin training kit an sponsor a, match day-a an hak tur jersey hi Nivia kut chhuak a ni thung. Ethan Go Mobile-in kit bag an sponsor a, Go Grip-in player leh coaching staff-te hnenah grip socks an pe ve bawk.

Mizoram manager K. Lalenghluna chuan, "Mizoram team tiphur thei tura mi inphalte chungah lawmthu kan sawi takmeuh meuh a ni. Mizoram tan theihtawp kan chhuah a, result ṭha pawh kan duh. Chutihrualin thawhrimna ringawt hi hlawhtlinna a ni lo a, engkim hi Pathian thu thu a ni. Mizo mipuite ṭawngṭainaa min lo hre ṭheuh turin ka chah duh che u a ni," tiin Vanglaini a hrilh.