Khelo India atana hmalaknate sawiho

Executive Committee (Mizoram) for Khelo India University Games 2023 hnuaia mawhphurhna hrang hrang changtu 'Functional Area Sub-Head' te chu nimin khan Directorate of Sports & Youth Services conference hall-ah an ṭhukhawm a, hmalak tawhna leh hmabakte an sawiho.

Khelo India University Games hi India rama University level inelna sang ber a ni a, tun ṭum hi a vawi 4-na niin hmarchhak state pasarihin an in thlen ṭawm a ni. Assam chu a thlengtu lian ber (main host) a ni a, sports discipline hrang hrang l5 a thleng dawn a, state dang zawngin sports discipline pakhat ṭheuh an thleng dawn. Manipur erawh an ram buai avangin an thleng ve dawn lo thung.

Khelo India University Games 2023-ah hian Mizoram chuan February 19-27 2024 chhungin mipa football inelna a thleng dawn a, India ram hmun hrang hranga university football team pariat an rawn kal dawn a ni.

Hemi atan hian Mizoram sorkar chuan Executive Committee (Mizoram) for Khelo India University Games a dinin, Sports & Youth Services Minister chu chairman niin, SYS director Lalnunhlua chu member secretary a ni a; member-te chu SYS, AMC, HFW, PHE, P&E, UDPA, IPR, Doordarshan, AIR, Tourism, Protocol, Higher &Technical Education, Mizoram State Sports Council, SP Aizawl leh SP Traffic aiawhte an ni.