Kan ṭan sauh sauh a ngai - Transport Minister

Transport minister Vanlalhlana chuan nimin khan Mizoram Transport Workers' Association (MTWA) General Assembly vawi 34-na a hmanpui a; 'Transport Lamtluang' tih souvenir a tlangzarh nghal. Vanlalhlana chuan an department chu an ṭan sauh sauh a ngaih thu a sawi.

Vanlalhlana chuan, Transport department chu mi hausa leh rethei, ṭhalai deuh aṭanga kum upa zawkte thlenga dawr ṭhin an nih thu a sawi a, "Mipui huapzo department kan nih angin sorkar hmingṭhat leh hmingchhiatah pawh mawhphurtu pawimawh tak kan ni a, kan puanven sawichhinga kan ṭan sauh sauh a ngai," a ti.

Sorkar kum kaltaa chhiah cheng vbc 50 vel hai luttu Transport department-a thawktute inpekna fakin Transport Minister chuan, dikna leh rinawmna nen an hna chanpual ṭheuhte ṭha taka thawk zel turin a chah.

Vanlalhlana chuan Transport dept.-a thawktute chu tunlai khawvel thiamna hmang ṭangkai tura chahin, "Mipuite pawh dan bawhchhe loin a hun takah lirthei document-te update ṭhain, chhiah pe ṭhin turin ka ngen a ni. Nu leh pate pawh an fate kum an tlin hma chu lirthei khalhtir lo turin ka chah," a ti.

Transport Minister sawi danin, Khawzawl, Saitual leh Hnahthial district-ahte hun rei lote-ah DTO office hawn theih a nih beisei a ni.

He hunah hian Transport director R Lalrammawia pawhin thu sawiin, mipuite tana a awlsam zawk nan thawktute chu online services pe tam turin a chah a, "Kum thum kalta aṭang khan contractor leh supplier-teah ba nei loin kan awm thei a, hei hi thil lawmawm tak a ni. Kumin sorkar kum chhung hian chhiah cheng nuai 5,000 hmu turin beisei kan ni a, theihtawpa kan ṭan a ṭul," a ti.

MTWA president F Lalzuithanga kaihhruaiin pension thlahna, member thite sunna, hruaitu thar thlanna leh rorel inkhawm neih a ni.