Excise leh CYMA-in ruihhlo do an sawiho; Infinchhuah tawn a ṭul - Excise Minister

Excise & Narcotics department (END) hotute chu an minister Lalnghinglova Hmar hoin nimin khan Central YMA pisa-ah lengin, CYMA hruaitute nen ruihhlo do chungchang an sawiho. Excise Minister chuan ruihhlo do kawngah infin-chhuah tawn a ṭul thu a sawi.

Lalnghinglova Hmar chuan thawhhona ṭha a awm loh chuan ruihhlo leh a kaihhnawihte chu awlsam taka do hneh theih a nih loh thu sawiin, "Thâ ngah leh ban nei sei zawk YMA nena thawhho chu ngaih pawimawh hmasaka neih a ni. Ruihhlo do dan ṭha leh awm ze nei zawk kalpui a nih theih nan infin­chhuah tawn a ṭul," a ti a, CYMA hruaitute chu END hmalakna kawnga duhkhawp lohna leh hmasawn ngaihna lai awm angte inthlahrung hauh loa hrilhhre zel ṭhin turin a sawm.

Excise Minister chuan department-a thawktute an hmun ngaia awm reng chu ruihhlo do kawnga thil ṭha ber a nih loh avangin department chhungah transfer & posting pawh kalpui chhoh mek zel a ni tih a sawi a, "Ruihhlo do kawnga theihtawp chhuaha sorkar puitu YMA-te hmalakna a fakawm. Duh thuhmun ṭheuh ṭheuh inkarah inep palh a awm loh nana ṭanlak tlan dan dap thiam leh thawhdunna ṭha zawk hnuaiah hmalakna chak lehzual a awm theih nana ngaihtuahna sèn tlàn a pawimawh," a ti.

Inkhawmhona kaih­ruaitu CYMA president Lalhmachhuana chuan Kumpuan Sub. Committee ruahmannain chhun zan zawma duty a nih thu sawiin, "Ruihhlo leh a kawltu mante dan angin thuneitute hnenah hlan ṭhin an ni. Councelling pek bakah home thlenga dahte pawh an awm," a ti a, department nena thawhho kawngah an inhawn reng thu leh hei hian rah ṭha zawk a chhuah ngei pawh a beisei thu a sawi.

Excise Minister hian ruihhlo do kawnga an thâ tihchakna atan CYMA hnenah Rs 50,000 a hlan a; CYMA lamin duhsakna lantirna atan Mizo ipetepui chei an hlan ve thung.