Hna ṭha takin kan thawk tur a ni, hlawk lutuk tum loh tur - CM

ZPM leader Lalduhoma, chief minister chuan nimin khan ZPM party hruaitu thar thlanna inkhawmah contarctor la ni ngai lote an nih ve theih dan tur leh contractor ngai ngawr ngawr rin tlut a nih loh dan tur ngaihtuah mek a nih thu sawiin, "Contract ṭha taka thawh tur, hlawk lutuk kan tum tur a ni lo," a ti.

Lalduhoma chuan, sorkar hmasa ningnawi khawma kal an la nih thu a sawi a, "Engmah keimahni kutthlaknaa tih ala awm lo a, budget session kan nei dawn ve chauh a ni. Kan kalchhoh zelna turah hian hnathawh kawngah kan hotute'n contract thawh dan chungchangah te, contractor nih theih danahte pawh kawng awlsam zawn ni se an ti," a ti a, contractor ni loten an thawh huai huai lohna turin contractor nih dante pawh kawng awlsam zawn mek a nih thu a sawi.

Mizorama consultancy firm awm mek chu an ṭhahnem tih sawiin Chief Minister chuan, "March 31-ah hian an tawp vek dawn a, April aṭangin consultancy firm dilna hun kan hawng ṭan dawn. Keimahni chhàn phâk loh contract-te a awm a nih pawhin a hnuaiah sub-contract tih dante a awm zel a, sub contractor-te'n an thawh kha an work done-ah chhiar dan a awm zel," a ti.

ZPM Leader chuan hna thawh chung­changah a ngal chak deuh chi hi an awm fo tih sawiin, "Minister hrang hrang hnuaiah hna hmu an awm ṭhin a, hei hian party-ah thawhhona a ti nuam lo ṭhin. Chutianga mi ngal chak bikte chu vèn an ngai dawn a, a vèn dan tur kan hruaitute'n an duang mek," a ti a, contract hna hmuh chungchangah a rualkhai thei ang bera hna sem a nih theih nan centralise a nih dawn thu a sawi.

ZPM sorkar hnuaia hna reng reng a ṭha tur a nih thu sawiin Lalduhoma chuan, "Sorkar hmasa hna kan hmu a, tunah pawh pawisa dawng tawh si hna la thawk mang si lo, thawh zawh loh la ngah em em, an thawh chhun pawh hmuh hrehawm tak tak a awm. Hei hi tuna kan lu tihaitu a ni a, kan hun aṭang chuan hna a lian emaw a tê emaw ṭha takin kan thawk anga, hlawk lutuk kan tum tur a ni lo," a ti bawk.