Ration card thlak diltu an tam

Food Civil Supplies & Consumer Affairs (FCSCA) dept.-in ration card subsidy ennawn a tum avanga dinhmun harsa zinga ration card var neite in report tura an tih bawhzuiin mi eng emaw zat chu an ration card neihna district civil supplies officer (DCSO) hnenah an in report tawh.

Vanglaini palai zawhna chhangin FCSCA dept. hotute chuan ration card var nei thlak duh mi eng emaw zat an in-report tawh thu an sawi a, "Rawn in report-te hi an ration card kan thlak sak ngawt dawn lo. An dinhmun kan zirchiang ang a, chuta ṭanga thlak àwmte chu thlak sak an ni ang," an ti.

FCSCA dept. tarlan danin, Mizoram sorkarin National Food Security Act (NFSA) a kalpui mekah dinhmun harsate zingah ration card var nei an awm chuan ziakin emaw phone call-in emaw mahni ration card neihna DCSO hnenah February, 2024 thla chhung hian in report tur a ni.

In report-te dinhmun hi uluk taka zir chian a ni ang a, Food Security Act hnuaia awm thei turte chu card pawl emaw, card eng emaw zingah dah luh an ni ang. Hei hi hmaih leh thlauhthlak nei loa dinhmun harsaten an chanvo an chan ngei theih nana hmalakna a ni.

Hengte bakah hian chhungkaw khawsak ṭha pangngai, mahni awmna veng leh khuaah pawh awm thei ve pangngaia inngai leh mite paw'n chutianga an hmuh zingah ration card eng emaw, ration card pawl emaw nei, chutiang ration card nei lo tura inngai an awm chuan ration card vara awm turin in report tur a ni.

Tarlan tawh angin, Mizoram sorkar chuan ration card var tana buhfaia subsidy a pek chu ennawn a tum. Ruahmanna siam a nih dan chuan ration card var hi chi hnihah ṭhen a ni dawn.

Chi khat zawk chuan sorkarin buhfai kg. khat Rs. 34-a a khul chuan Rs. 34 thoin a khul a ngai dawn a, pakhat zawk chuan Rs. 27 in a khul ang a, a bak sorkarin a la subsidised sak ang. Hei hi ruahmanna a ni a, thutlukna a la ni lo.