MNF-in hmunphiah lei turin sorkar an phût: Hmunphiah hralhnaah harsatna kan tâwk - CM

Chief minister Lalduhoma chuan sorkarin hmunphiah a hralhnaah Mizoram pum tuam turin harsatna an tawh mek thu leh sorkar kumtharah chuan buaina tawk tawh lo tura an inngaih thu a sawi a, "Hmunphiah thartute hriatthiamna kan ngen mawlh mawlh a ni," a ti.. Hetihlai hian MNF chuan thuchhuah siamin, an inzawrh ang ngeia hmunphiah lei turin Mizoram sorkar an phût thung.

Nimina ZPM party khawmpuiah Lalduhoma chuan, MLA inthlanpui 2023 neih hma khan thlai chi li lei tur an puan lâwk thu a sawi a, "Kan tum dan chuan keimahni budget kan neih hnuah, he financial year lo awm tur atana kan ruahman a ni a, sorkar hmasa eibang ningnawi kan chhawm aṭanga lei atan heng thlai tharte hi kan puang ngai lo," a ti.

Lalduhoma chuan sorkar hmasa sum hman bang aṭanga thlai lei tum lo mah se, kut hnathawktute ṭhian an nih angin pawisa awm ang angin tih hram dan an zawn thu a sawi a, "Thlai palite leina tur hi kan dah hrang. Sawhthing, aieng leh hmarchaah chuan kan la buai lo," a ti a, hmunphiah lei chungchangah erawh beisei an phak loh thu a sawi.

A kum leha tih tur kha tunah an tinghal tih sawiin Chief Minister chuan, "Chuvang chuan kan lo inpeih zân lo a, kan vawi khat tihna a ni a, inzir nan hmang ila, nakkum lamah chuan buaina kan tawk tawh lo turah kan ngai," a ti.

Hmunphiah bikah sorkar rate anga lei ngam an hmuh thu leh inremna ziak loin acknow­ledge­ment an siam thu sawiin Lalduhoma chuan, "Kumin bika kan hmun­phiah tharte lei turin chu firm nen chuan rua­hmanna kan siam a, hmun­phiah kan han kek a, kan ruahmanna siam­pui khan a han lei ta a ni," a ti a, rin aiin beisei an phak loh thu a sawi.

Chief Minister chuan hlawhfa chhawr tur an dap a, Mizo chhawr tur an van avangin vai an ngai tih sawiin, "ILP a lo ngai nen vai tam deuh han lakluh kha harsatna chin a lo awm bawk si a, hnathawktu a nei daih ta lo. A cover chin a zim ta a, a cover chinah chuan sorkar rate angin a lei thei. Mizoram puma hmunphiah thartute erawh hnathawktu indaih loh vangin cover theih a ni ta lo," a ti.

MNF chuan sorkar kalta khan kut hnathawktute tan tiin SEDP-ah cheng vbc. l50 a dah tih tarlangin, "Tun sorkar ZPM kaihhruai hian sorkarna an chan hnulawkah pawtpengin, he sum hi thlai thar lei nan tiin cheng vbc. 110 dahin, cheng vbc. 40 chu health care atan an dah nghal," an ti a, hmunphiah hralh tur tam tak awm chu a chingtuten an duh anga hralhna hre loin an hawihai mek niin an tarlang.

ZPM sorkarin thlai thar lei nan cheng vbc. 110 an dah chu hmang duh loin, hmunphiah lei tur hian RR Associate chu inremna a siampui tih tarlangin, "Beisei ang an thlenpui loh hnuah, society-te phungbawmah sawmin kawng kual zawk an dap leh mek a ni. Vawiin thlengin hmun­phiah chingtute chuan an hmunphiah hralhchhuah hun tawh em em, chhe mai thei dinhmuna ding chu hralhna hmu mumal loin hrehawm ti takin hun an hmang mek," an ti.

MNF chuan ZPM sorkar chu inthlan dawna mipui hmaa an inzawrh ang ngeia hmunphiah lei thuai tur leh an inzawrh anga a rang thei ang bera khawsa turin an phût.