Compulsory subject-a Yoga telh vangin MHZP-te'n lungawi lohna an lantir
Mizo Hindi Zirlai Pawl (MHZP) chuan Mizoram Hindi Training College (MHTC)-ah compulsory subject atana Yoga telh duh loh lantir nan an college staff-te office kal tur an dang a, principal nen inremna an siam tak avangin nimin khan lungawi lohna lantir hi an titawp.
MHZP tarlan danin, kum 2023-2024 Hindi Shikshan Praveen (D.El.Ed) leh Hindi Shikshan Parangat (B.Ed) zir laiah kum tir syllabus-a tel lo Yoga subject chu chawpchilh taka compulsory subject atan February, 2024 aṭang khan zirna kalpui a nih avangin zirtirtute college kal tur hi an dang.
Compulsory subject-a chawpchilh taka Yoga dah hi MHZP chuan ṭha an tih loh thu an tarlang a, "Hemi chungchangah hian February 2, 2024 khan MHTC Principal hnenah chawpchilh tak leh 2nd term exam hmachhawn mai tur an nih tawh avangin Yoga subject hi cancel tura hma la vat turin ngenna thlen a ni," an ti.
MHZP chuan, Yoga hi kristian sakhuana nen pawh a inhal avangin hetia barh luih an nih chungchangah hian an lungawi lohna chu Kendriya Hindi Shansthan, Agra hnenah ziakin an thlen nghal tih an tarlang.
MHZP leh MHTC inremna
■ 2nd Term Internal Examination February 19-29, 2024 a neih turah Hindi Shikshan Parangat leh Hindi Shikshan Praveen 2nd Year ten YOG VlGYAN exam loin assignment an submit aṭanga mark pek an ni ang.
■ Hindi Shikshan Parangat 2nd leh Hindi Shikshan Praveen 2nd Year final exam April - May, 2024-a mi turah 'Yog Vigyan' a tel loh theih nan ziakin Kendriya Hindi Sansthan, Agra-ah thlenin, theihtawpa hma lalsak an ni ang.