Chelsea an la Chuai lo e!

An chet chhiat season ni mah se Chelsea an la chhe vek lo - Mauricio Pochettino naute hian Aston Villa 3-1 a hnehin FA Cup last 16 an lut, an tan chanchin ṭha leh duhawm bik a ni.

Villa Park-ah Blues tan Conor Gallagher, Nicolas Jackson leh Enzo Fernandez ten goal khat ṭheuh an khung, hun tawp dawnah mualneitu lamin substitute Moussa Diaby hmangin goal khung ve mah se awmzia a nei phak tawh lo.

Blues hian last 16-ah chuan Leeds United an tum dawn - Premier League club ṭha Manchester City, Manchester United leh Liverpool te an la dam bawk a, nomawi chawi erawh thil awlsam a ni lo mai thei.

Nilaini zan FA Cup fourth round replay inkhel dangah - Chelsea bakah Nottingham Forest an tlang bawk a, Thawhlehni zan khan Southampton, Coventry leh Leeds United te an tlang tawh bawk.

An chak ta

Stamford Bridge-a an intawn ṭumin goal an khung lo a, replay khelh a ngaih phah. Nilaini zan Villa Park-a inkhelah hi chuan inhnehtawk a awm thei tawh lo - mualneitu Unai Emery naute hi mi tam tak rin zawk an ni hial.

Mahse, hun pawimawhah Chelsea an che fuh tlat. Minute 11-na lekah Gallagher hmangin hma an hruai, goal khatna an khung theih nan Jackson-a'n ball a la lut ṭha a, a laiah Noni Madueke chuan lo siamrem zeuhin Gallagher-a'n a hmawr a bawk.

Villa lamin tunlai striker ṭha Ollie Watkins hmangin an chhanglet nghal teuh hle. England international hian box sir deuh aṭangin ṭha takin shot mah se Blues goalkeeper Dorde Petrovic chuan a lo dang hram.

A che fuh zawk chu Chelsea bawk an ni leh tlat. Jackson chuan Malo Gusto-a cross chu box lai aṭangin a lo tauh lut. Villa defender-ten Jackson an veng tawk lo a, forward Cole Palmer-a'n tlarhnung a lo pawt buai ve bawk.

Second half-ah Chelsea ṭantuten an thil hmuh duh tak an hmu. Enzo Fernandez chuan yard 25-a hla aṭangin ama freekick hlawhchhuah chu mawi zetin a pet lut - Argentine midfielder freekick vang khan Frank Lampard vanglai an hre chhuak ngei ang.

Thawven thlak

Premier League-ah an che chhia a, an chak hleithei lo. Khawthlang chanchinbu mite chuan Aston Villa lakah an tlawm a nih chuan Poch hi ban a nih mai an ring, mahse inkhelh hmain Chelsea manager hian cub thuneitu lam aṭangin thlawpna a dawn ṭhat thu a sawi.

Tunah chuan Villa hnehin hmalam an pan a, beiseina thar an nei mek. Pochettino chuan, "Chelsea ang club ropuiah hi chuan hnehna chan zel a ngai, a chhan chu beiseina a sangin fans lamin chak zel an duh ṭhin.

"Kan match ṭhenkhatah chuan Chelsea khelh dan tur angin kan khel lo, tunah erawh kan phu ang ngeiin hnehna kan chang. Team naupang tak, indinthar ni mah ila kan nghet sawt hle," tiin a naute khelh danah a lungawi.

Chelsea hian FA Cup last 16 an luh bakah hian League Cup final an lut tawh, an season chhe taka ngaihah pawh nomawi pahnih chawi theih an la nei, season ṭha takah an la chantir thei - an champion lo chiah thei ve tho bawk.

Villa an hneh avangin fans an phur thar a, result ṭha an neih bakah an player pawimawh Enzo Fernandez-a'n chhuah a tum nia thu thang awm chu thu dik lo a ni tih an hre bawk a, tunah chuan phur takin kartawp an khar nghal thei ang.

Villa an tawp

Aston Villa hian season duhawm an hmang - Premier League lamah meuh pawh a sang zual pali zinga awm an tum ngam. Chelsea mualah goal an chhuah loh avang leh, anmahni khelmual Villa Park an hman thiam em avangin beisei an nei sang.

Unai Emery-a naute hian tun season atan Villa Park-ah inelna hrang hrang an hmachhawn aṭangin vawi 13 an chak a, vawi hnih chiah tlawm an nei. Mahse, Blues lakah an tlarhnung a phui lo a, chhanlet theihna remchang an neih a chhawr lo bawk.

Villa manager Emery chuan, "Chelsea mualah ṭha takin kan khel thei a, keimahni khelmualah zawk result kan nei ṭha lo hi a pawi. A bul ṭan ṭha mah ila goal khung theiha remchang kan hlah kha a pawi.

"Goal thum kan chhuah hnu kha chuan thil a harsa tawh. Tunah chuan EPL lam kan ngaihtuah leh tawh ang, league lamah kan boruak a ṭhain inrintawkna pawh kan nei sang zawk bawk," tiin beidawn a tum lo.

Aston Villa hian Pathianni zanah Premier League khel turin Manchester United an mikhual zui dawn, tun hnaiah Man United an harh thar avangin kar laihawla match hautak kheltu Villa tan hna a awlsam lo ang.