KIYG - Mizoramin hma a sawn lo!

Khelo India Youth Games vawi ruk neih a ni tawh a, kumina medal lak dan aṭanga thlirin Mizoramin hma a sawn lo tih a hmuh theih. Tamil Nadu-a neih KIYG-ah Mizoramin medal pahnih chiah an hawn a, infiamna lamah Mizoram tan kawng hrang hrangah hmasawnna tur a tam hle.

KIYG hi kum 2018 aṭang khan ṭan a ni a, inelna neih hmasak ber hi Delhi-ah January 31- February 8, 2018 chhung khan neih a ni. Mizoramin medal pathum gold pakhat leh bronze pahnih an la a, gold an lak zarah a pumpuiah 24-naah an awm.

Kum 2019 khan Pune, Maharashtra-ah inelna hi neih leh a ni a, Mizoram chet ṭhat ber ṭum a ni. Mizoramin medal 13 ngawt an la a, gold pali bakah silver pali leh bronze panga an la. Inelna pumpuiah 16-naah an awm pha bawk.

Guwahati, Assam-in kum 2020 khan inelna hi a thleng a, Mizoramin medal 10 an hawn. Gold pathum, silver pahnih leh bronze panga an la a, inelna pumpuiah erawh 24-na an ni pha chauh.

Kum 2021-ah Covid-19 vangin inelna neih a ni lo a; June 4-13, 2022-ah inelna hi sawn niin Panchkula, Haryana-ah neih a ni. Hemi ṭum hian Mizoramin medal pali an hawn a, gold pahnih bakah silver leh bronze pakhat ve ve an la. A pumpuiah 24-naah tho an awm.

Nikum khan inelna hi Bhopal, Madhya Pradesh-ah neih a ni a, Mizoramin silver leh bronze medal pakhat ve ve an la. A pumpuiah 28-na an ni pha chauh bawk. Kuminah Tamil Nadu-ah neih a ni a, nikum nen medal lak zat a inang. Overall-ah erawh 26-naah an awm thung.

Medal lak dan aṭangin teh ta ila, KIYG inelna paruk awm tawh aṭanga thlir chuan Mizoramin hma a sawn lo tih a lang. Haryana leh Maharashtra ten medal 100 chuang an la ziah a, NorthEast state zinga ti ṭha ber Manipur pawhin medal 30 bawr vel a la ziah bawk.

KIYG-a Mizoram a chet ṭhat loh chuan NorthEast Games-ah medal a lak a harsa dawn tih a hriat theih a, National Games-ah pawh chet ṭhat thut thu a awm lo. KIYG-a Mizoram chet dan hi thuneituten uluk taka an zir a, infiamna lama Mizoram hmasawn dan tur an duan chhuah a pawimawh hle.