Riyad Mahrez awmna Algeria an tla!
Algeria chu 2023 Africa Cup of Nations-ah last 16 lut phak loin an tla. Group match vawi thum an khelhah chak ni hmel an hmu miah lo a, point hnih chauh an hmuh avangin a mawngphah an ni, an tan knockout round luh theih a ni ta lo.
Thawhlehni zan Group D inkhelah Algeria hian Mauritania chu 1-0 in an hneh lo, inkhela goal awmchhun hi defender Yali Dellahi-a'n chawlhlawk hma deuha a khung niin, an ram Mauritania hi a vawi khat nan Afcon last 16 a hruai thleng.
Algeria erawh an che fuh lo chhunzawm, kum 2019 AFCON champion hial ni thei mah se tun hnai inelna neih hnuhnung pahnihah group stage paltlang zo loin an zinkawng a tawp ve ve tihna a ni.
Algeria an tla
Group D mawngphah luahtu niin Algeria beiseina a thamral a, an hneh loh Mauritania hi pathumna ni mah se, group danga pathumna dangte nen an point neih chhutin last 16 lut turin an dinhmun a ṭha tawk, nizan group dangte inkhelh hmain an dinhmun a chiang.
Algeria hian an group match hmasa lam an khel ṭha tawk lo, chutihrualin match hnuhnung berah hian chak ni se la chuan midang result ngaihchan tel ngai miah loa tlang thei tur an ni, hei erawh an thei ta si lo a ni.
Coach Djamel Belmadi-a'n rin loh tak maiin Mahrez chu bench lamah hun a hman hmasak tir a, goal an mamawh hnuah dah luh leh niin hlauhawm siam hman nual mah se inkhel result a thlak danglam phak tawh lo.
Manchester City winger hlui hian goal khung theihna remchang pawh a nei a, mahse a hlah tlat si. Hicham Boudaoui leh Aissa Mandi te tan remchang siamsak bawk mah se goalkeeper Babacar Niasse an paltlang thei lo a ni.
Pakhatna Senegal
Group C ten group match an khel zo a, match thum khelh hnuah Senegal chuan point kua hmuin a chung berah an awm - Sadio Mane awmna ram hian an khingpui hneh fai vek chungin last 16 an inhlangkai tihna a ni.
Senegal hian Abdoulaye Seck leh Iliman Ndiaye te goal hmangin Guinea 2-0 in an sawp a, champion lai team chauh hi team inlan zawng zawng zingah group match pathuma chak vek thei an ni, an cheṭha rih hle.
Inkhel dangah Cameroon chuan Gambia 3-2 a hnehin last 16 an lut fel ve bawk. Cameroon coach Rigobert Song chuan si ban nghak turin Manchester United goalkeeper Andre Onana aiah Fabrice Ondoa a hmang a, a hmang chhunzawm dawn em, tih erawh a sawi rih lo.
AFCON khelh laiah hian Nigeria, Cameroon, Angola, Cape Verde, Mauritania, Burkina Faso, Senegal, Egypt, Equatorial Guinea leh Guinea te an tlang tawh a, nizan khan group match khelh zawh niin hmunruak dang pawh an hnawhkhat nghal ang.