SAfrica President-in fiahna a paltlang

South Africa President Jacob Zuma chuan Thawhlehni khan Parliament-ah fiahna a paltlang.

President Zuma a mimal in cheina atan sorkar sum tam tham tak hmangah puh a ni a, state sum a hman hi rul tura hriattirna chu a ngaihsak loh vangi constitiution court chuan President chu ram danpui palzutah a lo puh tawh bawk.

South Africa parliament-ah hian rorellai, African National Congress hian seat 400 awmnaah majority a neih vangin President hian fiahna hi a paltlang thei ta a ni.

Parliament-a President fiahnaah Zuma thlawptu lamah vote 233 a tla a, paihthlak duhtu lamah vote 143 a tla thung. President paihthlakna tur motion hi eptu pawl, Democratic Alliance (DA) in pu lutin, vote lak a nih hma hian court-in ram danpui palzut ni a President a puh chungchangah debate neih a ni bawk. President Zuma hian a in thuam ṭhatna turin state fund dollar maktaduai 16 a hmang a, hei hi rul tura tih ni mah se thupek hi a zawm duh lo a ni.

Eptu pawl hruaitu, Mmusi Maimane chuan vote lak dawnah ANC member-te chu ram danpui vawnghim turin thu an lo tiam tawh nge, Jacob Zuma rawng an bawl zawk dawn tih thlang turin a ti a ni. Mahse ANC member-te chuan Zuma chuan ran danpui a palzut lo a, paihthlak a ṭul lo niin a sawi thung.

President Zuma hian a in cheina atan sum a hman ṭhenkhat a rulh leh loh avangin thupha a lo chawi tawh a, ANC General Secretary Gwede Mantashe chuan a thupha chawina chu an pawmsak tih a sawi.