Panama Paper put ru vangin Iceland PM a bang

Panana law firm, Mossack Fonseca-a tax document maktaduai 11.5 zet put ruah chhiah awl tum vanga rampawn lama sum chheprelhtu zinga a hming a lan tel vangin Iceland Prime Minister Sigmundur David Gunnlaugsson chu a bang.

Mosscak Fonseca document putru-ah anmahni dawrtu mi tam tak hming langin, ram hruaitu leh politician langsar tak takte hming pawh a lang tel a ni. Rampawn lama a sum neih a chheprelh dan puanzar a nih hnu hian PM Gunnalugsson hi bang tura nawr nghal a ni a, hemi hnu hian PM chuan an party, Progressive Party parliamentary group meeting-ah PM a nihna aṭanga a ban tur thu leh, deputy leader Sigurdur Inig Johannsson chu amah thlaktu tura a ruat thu a sawi a ni.

PM chuan rampawn lama sum chheprelh-a an puhna chu thu dik lo a nih thu a sawi a, mahse he thil avanga eptu lamin sorkar an beih chhunzawm zel tur chu duh loin a bang ta niin a sawi.

Hetihlai hian Panama firm chuan an document-te chu a putru ni loin, rampawn lam aṭanga an company hack sak a nih vang niin a sawi. An company hack a nih vang hian criminal complaint pawh an thehlut tawh tih firm dintu zinga mi, Ramon Fonseca chuan a sawi.