China FM-in Suu Kyi a kawm

Myanmar ram tlawha zin, China Foreign Minister Wang Yi chuan Thawhlehni khan Myanmar Foreign Minister Aung San Suu Kyi-i a hmu a, ram pahnihte inlaichinna ṭha zawk siam dan tur an sawi dun.

Naypyidaw-a meeting an neihah, Wawng chuan Myanmar sorkar thar lak luh a nih hnuah Suu Kyi-i sawmna anga zin a nih thu a sawi a," Myanmar ram chuan bung thar a kai a, China chuan Myanmar sorkar thar hian a ram chhunga party hrang hrangte inlungrualna leh a ram mipuite tana hmasawnna a thlen ngei a beisei a ni" a ti.

China leh Myanmar inlaichinna pawh bul an ṭan thar leh dawn a, China foreign minister chuan inhriatthiamna ṭha zawk leh thawhdunna zau zawk siampui turin a inpeih thu a sawi.

Minister Wang chuan ram pahniha rorellai party-te chuan nghet zawka thawhdunna tur an siam a beisei thu sawiin, harsatna awm theite pawh an chinfel zel theih a beisei thu a sawi bawk.

Thawhlehni vek khan Myanmar Parliament chuan Suu Kyi-i chu sorkar thara a hotu bera dahna tur post thar siam a remti a, an post siamsak turah hian ram dang prime minister dinhmun nen a in ang dawn a ni.

Sipai sorkar laia ram danpui siamah, ramdang mi nupui/pasal nei leh an fate ramdang mi citizenship neite chu Myanmar President atana dah khap a ni a, hei vang hian rorellai National League of Democracy (NLD) hotu, Suu Kyi-i hi President-ah dah theih a ni lo. Mahse NLD chuan Suu Kyi-i hnena thuneihna sang zawk pek a nih theihna turin a tan post thar siam a rawt a, hei hi Parliament chuan ngaihtuahin a pawm sak ta a ni.

Parliament-in bill a pawm tak hi President Htin Kyaw pawmpui turin thawn a ni ang a, a hming a ziah hnan hunah a taka hman theih a ni ang.