Mumbai beitu dam chhung tang turin hrem

Special Prevention of Terrorism Act (POTA) court chuan kum 2002 leh 2003-a Mumbai khawpuia ṭum thum bomb tihpuahnaa mawhphurtu bera puh, Muzammil Ansari chu damchhung tang turin a chungthu a rel.

Mumbai khawpui beihnaa inhnamhnawiha puh dang, Farhan Malik leh Dr Wahid Abudl Ansar-te pawh damchhung tang tura tih an ni bawk a, SIMI operative Saquib Nachan erawh chu kum 10 a tang dawn a ni.

Kumin March 29 khan court chuan Mumbai khawpui beih chungchangah mi 10 chu thiam loh a lo chantir tawh a ni.

Kum 2002, Decmeber 6 khan Mumbai-a McDonald outlet-ah bomb puakah mi 25 in hliam an tuar a, kum 2003 January 27 khan Monghibai Road-a Jawahar book depot bula bomb tihpuah a ni leh a, mi pakhat thiin mi dang 32 in hliam an tuar. Hemi kum vek, March 13 khan Karjat pan tur rela bomb kam chu Mulund station-ah a puak a, mi 11 thiin midang 82 in hliam an tuar a ni.