Hyderabad University-ah nawrh huaihawt leh

Hyderabad University-ah kumin January thlaa research scholar, Rohith Vemula intihhlum chungchangah zirlaiten nimin khan lungawi lohna an lantir leh a, buaina chhuak vangin zirlai 70 chuang man an ni.

University zirlaite hian Dalit zirlai intihhlum chhanah hian university Vice Chancellor Appa Rao chu inrawlha puhin bang turin an phut a ni. Nimin khan VC hoa Academic Council (meeting) nehi laiin zirlaite hian campus gate chu tichhiain Rao-a office-ah luh an tum a, security force-ten an lo dang a ni.

Nawrh hi zirlai pawl hrang hrang 14 intelkhawm, Joint Action Committee (JAC) in a huaihawt a ni a, VC Rao chuan an university chu jail-ah a chantir tawh nia sawiin, a rang thei ang bera bang tura an phut thu an sawi.

University zirlaite hian Rohith Vemula intihhlum chhan chu chi inthliarna a awm vang nia sawiin, he thilah hian Vice Chancellor chu a mawhphurtuah an puh. Kum 26 mi Rohith hi BJP zawmpui zirlai pawl pakhat hruaitu nen an intihbuai avangin hostel aṭanga hnawhchhuah a ni a, campus area-ah pawh a awm phalsak a ni lo. Hnawhchhuah a nih hnuah, January 17 khan hostel-a a thian pakhat room-ah inawkhluma hmuh a ni.

Vemula thlawptute chuan hnam hnuaihnung, Dalit a nih vangin enhran a ni tih an sawi a, university campus-ah chi inthliarna tihbona dan siam an phut bakah, Vemula tana rorelna dik an phut bawk.

Thla hmasa khan zirlai
ṭhenkaht chuan Vice Chancellor hi a office-ah luhkhungin hun eng emaw chen an hreng zui a, he thil thleng vang hian zirlai 25 leh zirtirtu pahnih chu man an lo ni tawh a ni.