NIT Srinagar-ah zirlai leh police-te intibuai

National Institute of Technology (NIT) Srinagar-ah Thawhlehni khan zirlaite leh police-te an intibuai.

NIT, Srinagar-ah hian kar kalta Ningani-a World Twenty20 semi-final-a India-in West Indies a hneh loh khan Kashmir zirlaite chuan West Indies chak chu campus chhungah an lawm a, hei hi Kashmir ni lo zirlai dangte chuan ngaithei loin buaina a chhuak ta a ni.

College campus chhunga buaina thleng vang hian venthawn thilah NIT hi khar nghal a ni a, ni thum khar a ni hnuin Thawhlehni khan hawn leh niin, class pawh kal chhunzawm a ni. Mahse state pawn lam mi zirlai awmte chuan an him tawk lo nia ngaiin campus hi chhuahsan an tum a, lungawi lohna lantira kawng zawh an tum chu police-te hian lo dangin an intibuai zui a, zirlai pali-in hliam an tuar.

NIT, Srinagar-a state pawn lam mi zirlai awmte chuan institute director hnenah an thil phut hrang hrang an thehlut a, college himna chu ngai pawimawh tura an duh thu leh, main gate emaw campus chhunga fountain-ah emaw India flag zar an duh thu an sawi. Hei bakah hian India ram dodal zawnga thiltihnaa inhnamhnawih zirtirtute chungah action lak an phut bawk.

Campus chhunga buaina a chhuah leh avangin Thawhlehni zan khan state sorkar chuan venhim hna thawk turin Central Reserve Police Force (CRPF) a dah nghal a, zirlaite chu venhimna ṭha tak pek a tiam bawk. Union Home Minister Rajnath Singh pawhin J&K Chief Minister thar Mehbooba Mufti biain, NIT buaina neih chungchang hi a sawipui nghal bawk. Deputy Chief Minister Nirmal Sigh chuan NIT-a zirlai te chu khawi state ami pawh ni se an mawhphurhna a ni tiin, an himna turin kawng hrang hrangin hma an la tih a sawi.

Nilaini khan Union Human Resource Development Ministry (HRD) chuan NIT-a thil thlen dan enfiah tur hian member pahnih awmna team a tir bawk a ni.

Minister of State in the Prime Minister's Office Jitendra Singh chuan NIT, Srinagar-a buaina thleng chu HRD Ministry chuan a chinfel thuai tur thu a sawi a, zirlaite chu boruak tichhe zawnga che lo turin a ngen bawk. Minister chuan campus chhung buainaah pawn lam mite inrawlh lo tur leh, politics lama hlawkpui tumna atana hmang lo turin a ngen.

Hetihlai hian Delhi Chief Minister Arvind Kejriwal-a chuan police-ten NIT zirlaite kut an thlak chu a dem thu a sawi. Delhi Deputy Chief Minister Manish Sisodia pawhin ramchhung hmun hrang hrangah zirlaite bitum an ni fo tih sawiin, "Nitin deuh thawa zirlaiten beih an tawhna ram awmchhun kan ni mai thei a ni" a ti. Zirlaite chu harsatna thleng ṭhin bul tumtu ang maia ngaiin beih an ni fo a ni tiin a sawi.

Kejriwal chuan BJP chuan Kashmir-ah Bharat Mata Ki Jai tia aute kut a thlak a, hetihlai hian ram-chhung hmun dangah he thu aupui duh lote lakah kut a thlak leh bawk si a ni, a ti.