Whatsapp-in privacy an ngai pawimawh thar

Apple iOS pawh FBI hoin an crack theih tak avang leh, password-a lock tawh pawh an hawn leh theih tak avangin social media leh hetiang kaihhnawih hoten privacy an ngai pawimawh thar lehzual a, a duh nazawng leh thei nazawngina an hawn theih loh turin hma an la mek zel.

Heng zingah hian Whatsapp pawh hma la chak ber pawl an ni. Encryption ṭha leh rintlak zawk an neih theih nan hma an la mek tih Thawhlehni khan an puang chhuak a, Facebook pawhin hetiang hian hma an la ang.

Whatsapp thuchhuah chuan an app hmangtute data leh communication te a him thei ang bera dahsak an tum tih an sawi. Mimal inbiaknate vawnhim a, midangina an en mai theih loh tura dah ṭhat leh venhimsak kawngah khawvela hma hruaitu tur an ni dawn tih an puang. Message thawn chhuah reng reng chu a thawntu, a va thawna leh group chat-a a dahnate chauhin an chhiar theih turin ruahmanna an siam a, a peih pawh an peih thawkhat viau tawh tih an sawi.

Hetiang hi tech app tena hma an lak chhoh dan a ni a, hetihlai hian US Congress chu dan thar siam tura beisei mek a ni. He dan thar siam tura an beiseiah hian technology firm te chu encryption an siam reng reng, dan bawh-chhiatna kawnga hnuchhui nana access (hawn) theih dan dahtir tura ruahmanna a awm dawn a ni. Hetiang dan hi France leh Britain-ah pawh hman leh lekkawh a nih dan tur ngaihtuah mek a ni.