Khawvela hmun pawimawhte dinhmun a ngaihtuahawm
World Heritage site tia humhalh leh khawvelin khuarel thil a ngaihhlut tak takte chu tuialhthei, gas leh thil laihchhuahnate avangin dinhmun hlauhawmah an ding mek.
World Wildlife Fund-in a zirchianna aṭangin World Heritage site-a puan zinga a zatve zet chu tuialhthei, gas leh thil hlu dang lei chhung aṭanga laihchhuah avangin chereu thei dinhmunah an ding mek a ni. World Heritage-a puan hmun 299 a awm a, hengte hi an awmphung danglam bik vang te, a chhunga cheng nungcha leh thil ṭo avangtea World Heritage-a puan zinga 114 te chu chereu thei dinhmunah an ding.
Heng hmun humhalh bik, chereu thei dinhmuna ding zingah hian China-a Giant Panda Santuary te, khawvel huapa Australia larna ber pakhat Great Barrier Reef, US-a Grand Canyon National Park te pawh a tel. A langsar dangah chan Belize ram tuipuia awm, tuichhung nungcha chi 1400 chuang zet chênna, Belize Barrier Reef Reserve pawh a tel a ni. Belize Reef hi tuipui kama construction eng eng emaw avangin chhia leh ral thei dinhmunah a ding.
Grand Canyon National Park, Arizona, US-a awm hi a chhehvela tui an hman dan mumal lo avangin dinhmun hlauhawmah a awm mek a, China ram Sichuan Province-a Giant Panda Sanctuary te chu tuialhthei leh gas zawn leh lak chhuah avangin a ram a chereu mek bawk. Europe-ah chuan Spain-a Iberian Lynx an tih, sakei lam chi chu hmun hnihah chauh hmuh tur an awm tawh a ni.