MIPUI SORKAR CHU

Sorkar thar, kalphung thara kal tur, mipui sorkar tiamtu, ZPM kaihhruai sorkar a lo ding a, thla khat vela upa a ni ve ta. Tuna a lan dan hi chuan ZPM vote ta lo ṭhenkhat chu mahni inthiam lo tawk lo awm ta se, a mak lo hial ang tih tur a ni. Chutih laiin ZPM sorkar lo nghakhleltu tam tak chu awm chin tawk hre lo khawpin phur se la, thil ṭha leh hmasawnna zawng zawng hi Mizoramin a chang ve dawn ta angah lo ngai ta pawh ni se, a mak lutuk lo thei ang.

ZPM sorkar aṭanga chawlhkar khat chhungin Chief Minister Pu Lalduhoma chuan, kum 30 chuang a lo sawi tawh D.A.H chu a'n tipuitling tehreng a! Hei zet chuan Mizoram Political history-ah hriatreng a hlawh ve tawh awm e. Congress-in cheng nuai khat sem an tum kha an sem kim tàk chiah leh chiah loh hriat theih a ni tawh lo va, keini naute, nuai khat dawng tur ngeia an thlan khan cheng nuai khat dawng chiah si lo khan eng emaw zat chu an dawng tih ka hria a. MNF-in cheng nuai thum sem tura an intiamna pawh a tawpah chuan cheng 25,000 bawrah a thamral a. Vawiina ṭhalaite hian kum 60/70 an nih thlengin he thudik hi an la hre reng ang chu maw. Pawisa fai sem hi keini ang chuan a hlauhvin kan hlau va, a tenin kan ten a, a semtu nih chu sawi loh, a dawngtu nih pawh finfiahna hmanrua atan kan ti a nih ngawt loh chuan zahthlak kan ti. Thlai thar leina tur pawisa, budget-a dah erawh tun dinhmunah chauh chuan van aṭanga Manna lo tla ang hialin kan ngai ropui a ni. Thawkrimte fuih phurna, thawkrimte hnena lawmman, inthliarna awm lova mipui tana sorkarin dikna leh rinawmna hmanga rawng a bawlna angah kan ngai. He thlai thar lei pawh hi sorkar tih ngai lovin eng cooperative emaw, eng sumdawng rualin emaw ti thei hial se tih nak alaiin, pawisa faia sem lek phei kha chu keini ang tan chuan thil rapthlak a ni.

Engkim mai hi tehna thu-hla vek a ni. He khawvelah hian miin ṭha a tih hi a tehna aṭanga ṭha a ni a, ṭha lo a tih hi a tehna aṭanga tha lo a ni bawk. Chawṭhing tlang leh chi ringawt hi chaw chhuan hnih nghei tawh tan chuan ruai ropui tak a ni thei a, duhthala ruaiṭheh zo hlim hlawt tan chuan hmuh peihawm lo tak a ni thei ang. Mizoram sorkar kan hriat tawh chin aṭangin kan tehna kan lek a, ZPM sorkar hi tunah chuan sorkar ṭha tak angin kan hmu lo thei lo. ZPM sorkarin Vairengte Checkgate-a duty police officer pahnih hrem a, Constable paruk a dah sawnte hi mipuiin kan ngaisang. Congress sorkar lai khan police officer pakhat hrem awm tak kha Home Minister-in 'Kan pawl mi leh sa an lo nia,' a tih hnu khan a thubuai kha a zuzi zui ta mai a. Kau-Tlabung chungchangah Engineer 13 te thubuai kha a zuzi ringawt a, khata ṭang kha chuan eirukna do thu pawh a zuihral ta niin a lang. Kha thil leh ZPM sorkar hmalakna hi kan khaikhin lo thei lo. Pu Zoramthanga'n, "Cheng khat pawh ka eiru lo vang," tiin lammual mipui hmaah intiamna thu a sawi a. "Kum sawm ral hnuah chuan sorkar hnathawk té ber aṭanga a lian ber thleng hian eirukna laka fihlim hi kan awm lo vang..." tiin a sawi a. Lammual khat tlata mipui hmaa a thusawi lai nen kha chuan hun a danglam zo ta.

Checkgate hrang hrangah Mizoram sorkar hnuaia thawk police zak thei lo mi tlem tein, dan dik lovin an hlawh bak pawisa an nei thei tih hi hman aṭang tawhin mi pangngai chin chuan kan hre vek a. Mahse kan sorkar hrawn tawh dang, ZPM ni lo chuan khawvel kalphung inti hrethiam takin mit an hupsan a, chu thil dik lo dahbo tum chu mi mawl tih tawkah an ngai ni hial tur a ni. ZPM sorkar erawh chuan Lee Kwan Yew-a te hnung zuiin chèt a thawh mai a ni. Mi zaktheilo tlem té leh an hotute hlawkna tur avanga he Zoram hmingchhe tur te, mipuite tawrhna turte hi van Pathianin hriain ZPM hi a sorkartir a ni lo vang tih hi sawi phak a ni lo. Ṭhiante, checkgate-a duty ve lote hlawh lak ruala la ve tho ṭhin si tan checkgate-a pawisa lo lak hi engti zawng mahin a thiang lo. Mipui sorkar, kalphung thar pakhat chu kan hmu e.

Eiru ve lo tura intiam thlap, kan PWD Minister pawhin kawng siamtute hnathawh a hmunah a en ta chat chat a. A vaiin en thei lo mah se kalphung chu a thar ngei chuan a lang.

Lengpui Airport-ah Congress leh MNF sorkar chhungin langsar em em maia VIP leh VIP lo inthliarna siamchawp, khawvel hmun danga kan hriat ngai hauh loh chu nithum chhungin ZPM sorkar chuan a thaibo hmak a. Hei ringawt pawh hi mipui mimir tan a hmuhnawmin a ngaihnawm. Airport chhunga luh dawn hian VIP leh VIP lo hi kan innek tawtin Airport kawtah khuan tu mahin harsatna pawh kan tawk lo va, khawvela Airport thawl pawl tak kan ni. Mahse Airport-a an kal ve chang chuan intih VIP an chak ta em em ni maiin a lang. ZPM-te chuan an campaign laia mipui sorkar siam an tum kha an la tum zel tih a taka lantir nan an hmang ṭangkai ta a ni.

Inthlan hmaa, 'Kalphung thar chu eng nge ni?' tia zawttu tam takte zawhna chu zawi zawia chhàn chhoh mek a ni a. Ka taxi chuanna khalhtu chuan, "Ka u pawhin an department-a promotion exam pawh beih ve a tum tawh. A hma kha chuan exam eng ang pawh ni se sawipuitu awm lo chuan awmzia a awm loh avangin a exam duh ngai lo va," a ti. Zirlai pakhat chuan, "Tunah chuan ZPM a sorkar ta bawk a, ka nu pawhin beiseina a nei ve leh ta," a ti. Ni, he beiseina hi a ni, vanram min hruai thleng hial tur chu. Mizoram mipui beisei nei tawh lote hnena beiseina lo piang thar leh ta hi a hlut zawng chawk chhuak thei chhiarkawp thiam, he Mizoram hian a la hring chhuak lo. Kalphung thar lo lang mek hian lung tichhe khawpin lawm a hlawh a, mipui an thlamuang a, an thawveng a, campaign laia, "Kan ram a tidam leh ang..." tia ZPM tuipuitute lam siau siau khan, an lo sa dik ta ngeiin a lang. Tihdam kan lo ngai nasa tawh em mai a, kan beidawnna khur kha a thuk teh asin. A chang chhah pawl chuan, "Ka Lalduhom ka zahpui lo'ng, a rawngbawl hna hum nen..." tih hla te pawh lo ṭahpui zawih zawih se, a mawh lo vang.

Tun kum nga kalta chhunga ṭhuthmuna beidawng tlawk tlawkte khan tunah chuan beiseina sang tak kan nei a, Mizo mipui, tunhnaia thlamuang thar ta thut hi vanram kai nghal vek tur ti ta ila, Mizoram mihring hi kan thawl hawk ang.