Kane-a'n EPL khelh leh a beisei

Hliam vanga chawl mek Harry Kane a dam hnai a, season kal laiah Premier League an khel chhunzawm leh thei a nih chuan Tottenham tana inlan theih ngei a beisei thu a sawi chhuak.

Tun dinhmunah chuan English football hi April 30 thleng an chawl lailawk mek, engtik hunah nge an khelh chhunzawm leh theih ang tih chu a chiang lo; neih chhunzawm theih erawh beiseina a sang.

England international Kane hi January thlatir khan Southampton nen an inkhelh ṭumin a inhliam a, a hnu lamah a la inlan leh lo. Covid-19 vangin league an chawl a, striker Kane hian match a khelh theih loh tura ngaih ṭhenkhat chu a khelh theih phah dawn.

Kum 26 mi Kane chuan, "Ka rawn kir leh thei hnai tawh hle, chawlhkar thum emaw kar li hnu velah chuan ka ṭhiante bulah training ka nei thei ve leh tawh ang.

"Damlohna khum aṭangin tunlai dinhmun ka lo thlir ve a, thuawih taka awm hun a ni tih ka hria. Chutih rualin infiammi nih chuan inkhelh hlan a nghahhlelhawm tawh takzet, ka dam fel hunah chuan nasa lehzual zawka training ka neih a ngai ang," a ti.

Kane hi in lamah a inenkawl mek a, amahin training hautak lo deuh chu a nei thei tawh. Tun season inelna hrang hranga Spurs tana goal 17 khung tawh hi North London club tan chuan a rawn kir hun a nghahhlelhawm khawp ang.

Season hmang fuh lo Tottenham hian manager thar Jose Mourinho an neih hnuah pawh beisei angin hma an sawn thei lo. League match 29 khelh tawhah point 41 hmuin pariatna an ni mek, an hnuai chiaha awm Arsenal aia an sanna chu point khat chauh a ni.



Share this Post

Login to comment
No Comments