Nadal-a'n damlo enkawltute a fak

Rafael Nadal chuan coronavirus kai enkawltu damdawi lam thiamte chu a fak hle a, tun dinhmunah chuan hnam pasalṭha an nih thu a sawi. Roger Federer leh Novak Djokovic te pawhin hna thawktute an fak bawk.

Covid-19 vangin tennis season an chawl mek a, June thla hma chuan tournament a awm rih dawn lo. Hri leng hian ziaawm lam a pan a nih loh chuan grass court season pawh an hmang thei ngei a ang em tih a chiang rih lo.

Grand Slam vawi 19 champion tawh Nadal chuan, "Tun hi khawvel inlungrual leh zai khat vuana a kal hun a ni, mahni inah ṭheuh awm ila, midang harsatna kan siam loh bakah damdawi in lama hna thawkte kan pui tihna a ni ang.

"Doctor leh an thawhpui zawng zawngte chungah ka lawm, mitin kan hmin theih nana hna thawktu peng hrang hrang te hi tunah chuan kan hnam pasalṭhate an ni. An thurawn leh sawite kan ngaihchan a ngai hle," tiin a sawi.

World number 1 Djokovic pawhin twitter lamah an chhungkua an awmkhawm lai thlalak a tarlang. Serbian tlangval chuan, "Inah kut fai takin kan sil a, tunah chuan hei hi midang kan puih theihna hnaivai leh ṭha a ni rih.

"Midang nena awmkhawm a him rih lo tih hriain pawn chhuak lo turin ka ngen, thil holam tak anga lak chiah ka ngai lem lo, a hlau lo te pawh thuneitute thupek zawm turin ka duh," tiin a sawi ve bawk.

Tennis season an chawlh rih avang hian world ranking pawh a ngaiin an kalpui dawn, an inkhelh leh hunah an dinhmun pangngai an luah leh ang. Hliam vanga chawl mek Federer tan ranking dang lo hi chanchin ṭha a ni ang.



Share this Post

Login to comment
No Comments