Kum 5 hnuah chuan sorkarna kan chang leh ngei dawn - Zodintluanga

Lungleia Congress Bhavan chu Lunglei District Congress Committee (LDCC) huaihawtin kum 2024 atan nimin khan hawn a ni a, minister hlui Zodintluanga Ralte-in thu sawiin, kum 5 hnuah Congress party-in sorkarna an chan leh ngei a rin thu a sawi.

Zodintluanga Ralte chuan, "Inthlan kan hmachhawn zo a, MLA pakhat chiah kan nei. Hei vang hian kan hnual mai ang tih a hlauhawm. Tun aṭangin insangmar leh ṭan ila, kum 5 hnuah chuan sorkarna kan chang leh ngei dawn tih hi ka ring tlat a ni," a ti.

Kum 2023 inthlanah Congress party-in vote an la hmu tam hle tih sawiin, "Congress hi kan la ṭha a, a thlaphànawm loh. Tun hma chuan Mizoramah party pahnih Congress leh MNF bak inkhing tak tak kan awm ngai loh avangin term hnih chhung kan insorkar chhâwk ṭhin a, tunah chuan party lian pathum kan awm tawh avangin term hnih a záwna sorkarna chan hi thil harsa tak a ni tawh dawn," a ti a; MNF sorkarin kum 5 chhungin Mizoram an sawp chhiat nasat thu leh inthlan leha ZPM khingpui ber tur chu Congress an nih thu a sawi bawk.

Zodintluanga chuan ZPM sorkar chu tun dinhmunah chuan mipuiin an laka beiseina an neih san em avangin an thil tihfuh tawk loh pawh an la ngaidam rih tih sawiin, "Mahse, hun a kal ang a, an insawi ang an nih lohzia mipuiin an hre chho dawn chauh, chu'ng hunah chuan mipuite hian kan thusawi an hrethiam tawh ang. ZPM nihna kan sawi ṭhinte a dikzia an hre tawh dawn a ni," a ti.