ZPM-in an intiam angin duhsak bik nei loin thawk se ka duh - Lalsawta

Congress party chuan an pisa, Congress Bhavan chu kum 2024 atan nimin khan an hawng a; hawnna inkhawma thu sawitu Mizoram Pradesh Congress Committee president Lalsawta chuan, ZPM-in an intiam angin duhsak bik nei loin thawk se a duh thu a sawi.

Lalsawta chuan, Mizoram inthlanah theihtawp an chhuah tih sawiin, "Manifesto ṭha takte kan duang a, hna nasa takin kan thawk a, mahse, mipuiin keini lam an hawi lo, ZPM lam an hawi a, chhin an duh a, an chhin phawt loh chuan an lungawi lo a ni," a ti.

MPCC President chuan, "ZPM hian an intiam ang ngeiin tu mah duhsak bik nei loin thawk se ka duh. Minister-te'n an thutiamah khan, mi zawng zawng angkhata en turin an intiam a, chuvangin party induhsaknate ti ve lo a, mi hausa leh mi dik lote hruai kawi mai mai theih ni lo turin ka duh," a ti a; ram tana ṭha lo ti lo ngam tur leh huaisen taka an tih tur ti ngam turin ZPM a duh thu a sawi.

Ram hruaitute'n ram an enkawl dan a pawimawh tih sawiin Lalsawta chuan, "Kum tharah hian hausakna ûm nana politics kan hman loh nan mi thar ni ila. He kum thar hian keimahniah harhna min pe se, kan ram hi a ṭha, Pathian pek a ni. Mihring pawh an ṭha, Pathian pek bawk a ni," a ti.

MPCC senior vice president Lal Thanzara kaihhruai inkhawmah hian Lalsawta chuan, Mizoram hma lam an thlirnaah Pathian lam hawi tura an mite chahin, "Pathian duh dan kan hria, Bible leh biak-in leh hmun hrang hrangah min hrilh hretu kan nei zel a, Pathian lam i hawi ang u," a ti a; hun lo kal turah Pathian thu a taka zâwm turin an mite a fuih a ni.