Mi taimate an dingchhuak dawn - ZPM Vice President

ZPM party chuan nimin khan an pisaah chhung inkhawm an hmang a, ZPM vice president Rev. Dr K Thanzauva'n thu sawiin, "Mizoramah economic reform a thlen theihna turin hmalak mek a ni a, he sorkarah hian mi taimate an la dingchhuak dawn," a ti.

ZPM Vice President chuan, Mizoram politics-ah siamṭhatna a thleng mek nia sawiin "Kan hotute hmalakna kan chhuangin min tilawm em em. Ka duh ber erawh a ṭhing her lum leh mai mai ni lo, a tak taka revolutionary reformation a lo thlen hi ka duh leh beisei ber a ni," a ti a, Mizote'n insiamṭhatna tur tam tak an neih thu a sawi.

Zûk leh hmuam leh ruih theih thilte chu tih tak zeta doa beihpui thlak a nih chuan an hlawhtlin ngei a rin thu sawiin K Thanzauva chuan, "Kan sorkarin mi retheite khai chhuahna tur leh ṭhalai hna nei lote'n hna an neih theihna tura ruahman, hand holding policy hi a hlawhtlinna chu mipuiah a innghat dawn. Sorkarin theihtawp chhuaha min hlui thil tihlawhtling tur chuan thawhrimna leh taimakna a pawimawh dawn a ni," a ti.

Rev. Dr K Thanzauva chuan, Mizoramin economic reform bakah education reform a mamawh tih sawiin, "Zirna siamṭhat beihpui kan thlak loh chuan he ram hi kan hniam tual tual dawn. Sum tam tak he ramah hian a lo luang lut dawn a, rùn dâl mai ni lo, tih tak zeta kan thawh a ngai a, a lem ni lo, a tak tak kan thlen a hun tawh," a ti a, ZPM sorkar hnuaiah Mizoramin hma lam a pan zel dawn thu a sawi.