Lirtheia chetsualna a tlahniam; 2023-ah dan bawhchhia 14,683 man

Aizawl khawpuiah kum 2023 chhungin dan zâwm lo lirthei 14,683 man a ni a; lirtheia chêtsualna vawi 22 thlengin mi 16 an thi. Kum 2022 aiin 2023-ah lirthei dan zâwm lo man zat leh lirtheia chetsualnate a tlem zawk.

Aizawl Traffic Police aṭanga Vanglaini thu dawn danin, kum 2022 khan Aizawlah lirthei dan bawhchhia 18,334 man a ni a, kum 2023 chhungin 14,683 man a ni thung. Hetih lai hian, October 2022 aṭanga MV (Amendment) Act, 2019 hman a nih hnuah lirthei dan bawhchhiate pawisa chawi a pung a; January-December 2022 chhunga dan bawhchhia 18,334-te'n Rs 82,70,000 an chawi laiin, kum 2023-a lirthei dan bawhchhia 14,683-te pawisa chawi tling khawm chu Rs 1,05,46,412 a ni.

AMC huam chhungah kum 2022 chhungin lirtheia chetsualna vawi 37 a thleng a, mi 23 thiin, mi 34 an hliam. Kum 2023-ah lirtheia chetsualna vawi 22 a thleng a, kum hmasa aiin 15-in a tlem zawk a, lirtheia chetsualna vanga thi mi 16 leh hliam mi 22 an awm.

Traffic Police hotute chuan, lirtheia chetsualna a tlem theih nan theihtawp an chhuah thu an sawi a, "Awareness campaign te, rûi chunga lirthei khalh, tlân chak lutuk, two wheeler-a inphurh theih zat aia tam inphur, kum tling lo lirthei khalh leh kawng hrang hrangin special drive kan kalpui nasa a, hei hian rah ṭha tak a chhuahin kan hria," an ti.

Kum 2023 chhunga Aizawla lirthei dan chi hrang hrang zâwm lo 14,683 man zingah March thlaah dan zâwm lo man tam berin, lirthei 2,051 man a ni a; November thlaah 619 man niin, a tlem ber thla a ni.

Lirthei dan zâwm lo zingah hian two wheeler tam 10,274 man niin a tam ber a, lirthei man zawng zawng 14,683 aṭangin 69.97% a tling. Medium motor vehicle (MMV) 40 man a ni a, a tlem ber thung.