Meghalaya : HYC-in scholarship pek chhuah hun hnuhnung siam

Hynniewtrep Youth Council (HYC) chuan scholarship pek chhuah theih loh avanga nawrh huaihawt an tum chu Meghalaya sorkarin sorkar laipui hnen aṭanga scholarship pek chhuah tur sum an dawn tawh thu an sawi hnuah sutin, zirlai pawlte hian kar hnih a ral hma ngeia scholarship-te pe chhuak tura an phut thu an sawi.

Zirlai pawl, HYC hian state sorkar chu hriattirna khauh tak pein, scholarship dawng turte account zawng zawngah kar hnih chhunga scholarship sum pe vek tura an duh thu leh, hun tiam an siam chhunga scholarship an dawng lo a nih chuan action lak chhunzawm a ni ang tiin an tarlang.

HYC hian North-Eastern Hill University Students’ Union (NEHUSU) ruala press mite kawmin, scholarship pek chhuahna atan hun tiam an siam thu an puan bakah hian ram leilung fa, zirlaite tana zirna sang zawk zir tura zirna in hrang hranga 80% reservation an phut thu an tarlang nawn leh bawk a ni. HYC hian Common University Entrance Test (CUET) hlutna chu a tlakhniam zel thu leh, higher secondary exam pawh miin an ngaihhlut tawh loh thu sawiin, sorkar chuan ram leilung fate dinhmun a ngaihpawimawh a ṭul tawh thu an sawi.

State sorkar chuan computer hmanga exam ngai chi, CUET leh NET exam-na atan inbuatsaihna kawnga zirlai zawng zawng dinhmun a inan theih nan a bika coaching centre a din a ṭul thu tarlangin, Meghalaya-a exam centre tlem lutuk te chu veiawm an tih thu an sawi bawk a ni.