Arunachal Pradesh-a Namsai-ah section 144 puang

Arunachal Pradesh-a Namsai district kawngpuia chetsualna thleng avanga buaina chhuak chuan harsatna nasa zawk a thlen loh nan section 144 puan a ni.

January 13 tlai khan Koseng khuaa kal tur motor, Krutasi Makat-a khalh leh amah tawk zawnga tlan, motor chak taka khalhtu nia sawi, Badal Tanti chu intawk lawiin lirthei khalhtute inkarah hian buaina a chhuak a ni. Makat-a ṭhiante hian motor dang khalhtu hi um zuiin an inhauh buai hnuah lirthei pakhat zawk khalhtu hian a chhungte leh ṭhiante a pun ve leh a, hemi hnu hian buaina nasa tak a chhuak chhunzawm niin an tarlang. Buaina chhuaka inhnamhnawih hi mi 20 vel niin an tarlang a, silaite hmeh puah niin police-te chuan an sawi. He buaina avang hian district thuneitute chuan buaina nasa zawk chhuak tur ven nan CrPC section 144 an puang a ni.

Namsai superintendent of police, Sangey Thinley chuan buaina chu an thunun tawh nia sawiin, pawl pahnih intibuaite aṭang hian hliam tuar mi 15 an awm thu a sawi bawk. An hliam tawhte hi hlauhthawnawm ni lo mah se, hliam tuar zawng zawngte hi Assam-a Dibrugarh AMC-ah thawn an ni. Buaina chhuak avang hian pawl hrang hrangte chuan thuchhuah an siam a, All Tai Khamti Singpho Students’ Union (ATKSSU te chuan Badal Tanti hi man ngei ni se an duh thu district thuneitute hnenah hian an thlen bawk.