Newcastle mikhual tur City ṭha zawk

St James' Park-ah zanin dar 11:00 hian Newcastle United-in Premier League champion lai Manchester City an mikhual dawn. Pep Guardiola chhawr theih turin Kevin de Bruyne leh Erling Haaland te an awm tawh a, Magpies tan point hlawhchhuah a harsa ang.

Man City hi FIFA Club World Cup-ah champion mah se season ṭha tak an hmang bik lo a, vawi thum ngawt an chak tawh lo. Pep-a hote hi table-ah pathumnaah an awm mek a, nomawi chawi an duh a nih chuan chetsual a rem tawh lo. Chutihrualin tun hnai bikah erawh City hi an che ṭha leh tawh hle.

Premier League champion lai hi match nga chhung an chak zawn leh tawh a, match ngaah hian goal 17 ngawt khungin goal khat chiah an chhuah. City lawmna belhchhah turin De Bruyne a dam tawh a, talent nei ṭha bik midfielder hi bul ṭan tura ngaih a ni. De Bruyne awmna City team an danglam a, a hlawkpui ber tur chu Erling Haaland a ni thei ang.

Haaland hi ngalrek hliam vangin thla khat chuang a khel tawh lo a, chutihrualin training a zawm tawh. Norwegian striker hi inlan thei dinhmunah a ding a, bul a ṭan erawh a rinawm lo zawk.

City hian Premier League-ah Newcastle United hi nikum August thla khan 1-0 in an hneh tawh a, mahse September thla tawp khan Carabao Cup third round-ah an hneh loh avangin League Cup aṭangin an tla.

Pep-a hoten tun season-ah beisei an pha tawk lo a, Eddie Howe-a hoten beisei an la pha lo lehzual. Hliam vangin Newcastle an buai a, pawisa thapnaa inhnamhnawih Sandro Tanoli hrem an tuar viau bawk.

Mapgies hian FA Cup-ah Sunderland 3-0 in hneh bawk mah se league-ah match hnuhnung pathumah an chak lo vek. Howe-a hote hian Liverpool an hneh loh chu a hriatthiam theih a, mahse Nottingham Forest leh Luton Town lehzel hneh loh erawh mualphona a tling. Newcastle hi hliam vanga an buai bawk avangin City laka point khat hlawhchhuah hi result ṭha a tling ang.