Liverpool-in kal lai an rel - an zam lo!

Premier League hmahruaitu Liverpool-in a vawi 10 nana League Cup champion nih an tumna kawngah kawng dik an zawh zel a, Nilaini zan khan an mikhual Fulham lakah goal chhuah hmasa zet mah se, 2-1 in an 'comeback'.

Anfield-a inkhelah Fulham tan Willian chuan goal hmahruai a khung a, goal dang lut loin chawlhlawk hman a ni. Mahse, second half-ah Liverpool an insiamṭha a, Curtis Jones leh Cody Gakpo hmanga goal khungin, Fulham an lehthal.

Liverpool-in Anfield-ah hnehna chang mah se, second leg khelh tur a la awm a, final lut chiang an la ni lo. January 24 zanah second leg khelh a la ni leh dawn a, Craven Cottage-ah Reds an leng dawn.

Hemi hrechiangtu Jurgen Klopp chuan, "A la tawp lo," tiin match khat an la hmabak thu a sawi a, tun atan erawh kar khat chhung thlasik chawlh an hmang ve phawt ang - Anfield-ah match 16 zet chu a zawnin tlawm an nei ta lo a, heng zinga match 14-ah hian an chak.

Barakhaih

Tun season-a team pahnih intawn hmasakin Anfield-ah tho an intawng a, Fulham-in minute 85 thleng chu 3-2 in hma an hruai hial. Mahse, hun tawp hnaih minute nga chhungin Liverpool hian goal hnih an khung a, a tawpah 4-3 in an chak hram.

Fulham-in an chak thei tih inhre chungin Anfield an tlawh a, Liverpool squad an kim lo tih an hre tel. Tun hnaia khel ṭha leh an intawn hmasaka an ngam loh Trent Alexander-Arnold chu hliam vangin a inlan thei lo a, an intawn hmasaka goal khungtu tho Wataru Endo chu Asian Cup khel turin a zin bawk.

AFCON lamah Reds chhuanvawr Mohamed Salah a feh chhuak a, ani awm lo ringawt pawh tawrh tham a ni. Hetihlai hian season duhawm tak hmangtu Dominik Szoboszlai hliam a la dam thei lo a, Anfield-ah kim loin Liverpool an inlan.

Minute 19-naah Fulham-in Anfield an ngawihtir nghal a, Virgil van Dijk ball tauh sual aṭanga ball kal zel chu Willian chuan ṭha zetin goal-ah a chantir - Liverpool player an hawihai a, fans an ngawi chawi lehzual.

Mahse maw...

Team ṭha danglamna chu an chak dawn lo emaw tih tawh hnuah pawh an insiamṭha leh ṭhin hi a ni a, chu team ṭha danglamna chu Liverpool-in an pho chhuak - minute 68-naah Curtis Jones a inlar a, English midfielder hian si phurh a sut.

Darwin Nunez-a ball pek chu a insiamrem hnuah goal-ah a 'shot' a, Tosin Adarabioyo-a ke a per tel avangin Bernd Leno-a'n ball kal dan a chhut sual a, a chhuah chiang hle.

Minute thum a liam a, Liverpool bawkin goal an khung nawn. Cody Gakpo hun a inher chhuak a, Reds hmahruaina goal a khung - hei pawh tun hnaia sawisel hlawh Nunez-a siamsak bawk a ni.

Sawi hmaih thiang lo chu Diogo Jota a ni. Liverpool goal hnih hi Nunez-a siamsak ve ve a nih rualin Portuguese forward Jota hnathawh ṭhat aṭanga thleng a ni a, Salah awm loh hlanin Reds tlarhmanten an hna an thawk chhunzawm zel.

Thukhawchang

Liverpool boss Klopp chuan, "Final lut chiang sa ang hiala inkhel awlsam ka beisei lo a, second leg-ah chuan bul kan ṭan ṭhat theih ka beisei - hnehna kan chang a, chu aia lawmna tur chuang erawh a awm chuang lo," a ti.

German coach chuan goal khung lo mah se khel ṭha tak Nunez fak zuiin, "Darwin-a dinhmun hi sawifiah dan pawh ka thiam lo zawk. Goal hmaah a vanduai reng a, chuti chung chuan team tan a thawhhlawk em em a, goal thawk chhuaktu a ni," a ti a, a striker a fak.

Fulham boss Marco Silva chuan, "A harsa dawn tih kan hre sa. Hetiang level-ah chuan game awlsam beisei chi a ni lo a, kan team hmachhawn hi ni thum liam ta maia Emirates Stadium-a Arsenal hneh thei kha an ni.

"First half kan khel ṭha a, ni dang ai chuan kan defensive hret a, mahse, kan ti ṭha. Tlarhmaa an player neih en ila, tihsual min hrem reng thei khawpa quality ṭhiau an ni. First half-ah kan ti ṭha a, second half-ah min nawr na ta deuh a ni," a ti a, an chak loh a pawm.