Kar thum chawl tur Arnold

Liverpool tan chanchin lawmawm lo a awm, an defender pawimawh Trent Alexander-Arnold chu khup hliam vangin a inkhel thei dawn rih lo. Reds assistant manager Pep Ljinders sawi dan chuan kar thum chhung vel a chawlh a ngai dawn niin a lang.

England international Arnold hi Arsenal nen FA Cup an khelh ṭumin a inhliam a, nizana Fulham nen Carabao Cup semifinal first leg an khelh ṭum pawhin a inlan thei lo a, tun thla chhung chu a chawlh a ngai dawn.

Lijnders chuan, "Trent-a khup hliam endik a ni a, a rei lo lamah pawh chawlhkar thum chu a chawlh a ngai dawn, a awm loh chhungin kan ngai hle ang. A tel loa khelh dan kan ngaihtuah chhuah thuai a ngai dawn.

"Team tana player pawimawh bik a ni a, hun harsa laiah pawh ball ṭha leh inkhel result ti danglam tur ball pe chhuak thei ṭhintu a ni," tiin an defender hmunruak hnawhkhah a harsat tur thu a sawi.

Premier Leaguer-ah Liverpool hian point thumin hma an hruai mek. January 21 hian Bournemouth an tum dawn a, tun thla chhungin Bristol Rovers nen FA Cup fourth round an khelh dawn bakah, league match khel turin Chelsea an la mikhual dawn bawk.

Reds hian Africa Cup of Nations khelh vangin Mohamed Salah an chhawr thei dawn rih lo, hei bakah hian midfielder Wataru Endo chu Asian Cup khelin Japan tan a feh chhuak - an player pawimawh pathum an chhawr thei dawn rih lo tihna a ni.