Asian Cup: Tute nge player langsar?

Asia khawmualpuia ram leh ram inelna sang berah hian player langsar tak tak, European football thlenga hming chher inlan tur an awm nual. German legend Jurgen Klinsmann-a enkawl South Korea te hi en ila, Euro pawh khel se, an ngaihtuahawm lo ang tih tur khawpin an squad a chhah ṭha.

Japan-te hi player 26 zinga 20 chu European football khel an ni a, Celtic striker chhuanvawr Kyogo Furuhashi an ko tel lo mah mah!

Son Heung-min

Kum 31 mi Son Heung-min chanchin inhrilh nawn a ngai lo. Tottenham Hotspur captain hi 2021-22 season-a Premier League Golden Boot dawng thei a ni a, tun season-ah league match 20 aṭanga goal 12 khungin assist vawi nga a nei a, tun Asian Cup-a player langsar berah a chhal ngam hial ang.

Takefusa Kubo

Japanese attacking midfielder hi La Masia chhuak, Real Madrid youth team tana khel zui kha a ni a, tunah Real Sociedad tan khel mekin, tun season match 25 a khelhah goal ruk khungin, assist vawi li a nei tawh.

Kim Min-jae

Bayern Munich defender hian season hmasa khan Napoli chu Serie A nomawi a chawipui a, football khawvela defender ṭha ber pawl a ni der tawh - a tifiahtu chu Asian defender zinga Ballon d’Or dawng tura chhawpchhuah hmasa ber a nihna hi a ni. South Korea tan match 56 khelin, goal li a khungsak tawh a ni.

Mehdi Taremi

Kum 31 mi Iranian striker hi Portuguese club ṭha FC Porto tan goal khung khawl a ni a, Porto tan season thum khel tawhin, season khata goal 20 aia tam khung loh lai a nei lo - tun season-ah match 24 khela goal ruk khungin, assist vawi li a nei.

Player dang

Asian Cup-a inlan tur player langsar zawng zawng tarlan sen an ni lo - Qatar chhuanvawr Almoez Ali, Australia captain leh AZ Alkmaar keeper Mathew Ryan, Iran tan match 75-a goal 49 khungtu, AS Roma striker Sardar Azmoun, Japan forward Kaoru Mitoma (Brighton & Hove Albion), Liverpool midfielder leh Japan captain Wataru Endo leh Paris Saint-Germain midfielder, South Korea tana inlan tur Lee Kang-in te ho pawh an la awm.