Covid-19 khan chakna min pe - Rugani

Daniele Rugani chu coroanavirus lak aṭangin a fihlim tawh a, Juventus defender hian hripui leng vanga harsatna a tawh chuan kawng hrang hrangin chakna leh chhelna a siamsak thu a sawi.

Serie A player zingah Rugani hi Covid-19 kai tih hriat chhuah hmasak ber a ni, tunah erawh harsana nei loin Turin khawpuiah a ṭhiante training a zawm leh thei tawh - league an khelh chhunzawm a nih pawhin a inlan thei ang.

Italy international Rugani chuan, "Ka dam tawh a, ka dinhmun pawh a ṭha tawk takzet. Hri ka kai tih ka hriat tirh kha chuan ka rilru a hrehawm a, ka hlau bawk. Mahse vanneih thlak takain harstana lian zawk ka tawk lo hlauh.

"Ka kawppui Michela Persico-i'n nau a pai mek a, hri ka kaichhawng ang tih ka hla hlau hle, ka rilru ti nuam lo tu ber pawh a ni. A rang thei ang berin ka inkhung hrang nghal, min enkawltu doctor-ten ṭha taka min tih dam avangin ka lawm hle," a ti.

Nizan khan Serie A khelh chhunzawm hun tur an ngaihtuah a, he thu buatsaih lai hian an thutlukna kan hre hman lo. Rugani chuan entu nei loa match khelh chhunzawm chu khawhar thlak dawn hlea a hriat thu a sawi.

Juve defender chuan, "German Bundesliga ka en a, stadium ruak veka inkhelh chu a boruak a danglam hle. Bench-a ṭhu player pawh an inkarhlat hle, kan ṭhat tlanna tur chu ni mah se football hlutna chu a hniam phah hlein ka hria; duhthlan tur dang erawh kan nei si lo," a ti.

Italian league an chawlh lailawk hma khan Juventus chuan Lazio lakah point khatin hma an hruai fal mek. Maurizio Sarri naute hi an champion leh a nih chuan tun hnai season kua (9) chu an champion vek tihna a ni ang.