Zote Toyota Mizoram Premier League-ah a vawi khat nan Mizoram Police an champion

Mizoram Premier League ṭan aṭangin kum 11 a ral a, inelna vawi 10 neihnaah chiah Mizoram Police hun a inher chhuak. Final hmuhnawm bik a ni a, Mizoram Police-in 2-0 in hma hruai hman mah se Chanmariin an sut zo. Minute 120 chhungin 3-3 a ni a, penalty shootout-ah Lalbiaksanga Colney hote 3-2 in chak.

December 22, Zirtawpni zan khan Zote Toyota MPL10 final hi RG Stadium-ah khelh a ni a, entu an ṭhathnem avangin final a 'hot' phah. Police-in tlawm an duh lo a, Lalrinzuala red card hmuh hnuah pawh huaisen takin an khel. Penalty shootout-ah keeper F. Lalmuanawma'n save vawi hnih a neih bakah a pet goal a, Police a champion pui.

Police hun

Final boruak sangah Police-in bul an ṭan ṭha a, tawnhriat nei player danglamna a lang. Malsawmfela a langsar a, minute 16-naah goal hmahruai a khung. Chanmari tlarhnung ṭhiat tura H. Lalbiakthanga, Sawmfela leh R. Malsawmtluanga te ball inpe kual a mawi takzet.

Sawmfela thiamna a lang zel a, minute 29-naah Police striker hian Chanmari defender vir khumin F. Lallawmkima a pe a, Lawma hian rang zetin Biaktea a pe. 'Keifang Keite' hian MPL10-a a goal hmasa ber a khung.

Police-in an chance neih an khung ve ve laiin Chanmari erawhin an hun ṭha neih an bawhpelh a, Lalkhawpuimawia bicycle kick chu keeper Muanawma'n a dang.

Chanmari hun

Police dinhmun a ṭha a, mahse hun rei lote chhungin a danglam. Sialhawk tlangval Crespo Vanlalhriatpuia a rawn lang a, minute riat chhungin goal hnih a khung. Crespo hian box chhung aṭanga a pet goal hnuah a tauh goal leh bawk.

Darkar khat a ral chuan 2-2 a ni a, Chanmari dinhmun a ṭha leh ta zawk. Dinhmun ṭhat belh nan Zozoa titlutu Lalrinzuala'n referee bula a sawisel nasat avangin yellow card vawi hnihna a hmu a, hnawhchhuah a ni.

A tawpah 'drama'

Player 10-a khel Police dinhmun a chhiaah a ngaih theih a, mah se Sawmfela an nei tlat. Minute 73-naah Sawmfela ball pek chu Fakzuala'n a khung.

Hliam chunga khel lui Kelkang pa Mapuia an thlak tawh a, Chanmari mamawh chhanna chu bench aṭanga rawn lut Vincent a ni. Minute 80-naah Lalmawizuala cross chu Vincent-a'n a tauh lut a, Chanmari thawm a ring hle. Minute 90 chhungin 3-3 a ni.

A goal lo

Extra time-ah Police tawnhriat a lang a, a tlem zawk an nih a lang lo. Goal chance pawh an ngah zawk mah a, Sawmfela pawh hun tawp thlengin a hmuhnawm.

Chanmariin hun tawp lamah ball an inpe kual thei chauh a, mah se ball an vawrh ṭha ṭhin lo. Police keeper Muanawma aiin Chanmari keeper T. Mawia'n extra time-ah hna a ngah zawk.

Muanawma Show

Penalty shootout-ah Sawmfela'n a pet over nghal a, Police player dang Lalruatpuia pawhin a pet over.

Mahse, Police hian Muanawma an kawl a, Mizoram keeper hian John leh Ruatmawia te penalty pet a dansak a, goal ṭha tak a khung. A vawi khat nan Police a champion pui.