Zanin dar 8:00-ah MPL10 Semifinal : Chanmari FC khingpui tur champion lai Chawnpui FC

Zote Toyota MPL10 semifnal-ah vawi hnih champion tawh Chanmari FC-in zanin dar 8:00 hian RG Stadium-ah champion lai Chawnpui FC an hmachhawn dawn. Laldampuia kaihhruai Chanmari hi league round-ah pakhatna an ni a, semifinal-a an khingpui tur thlengin duh thlang thei an ni a, an thlan chu Lalrindika Hmar enkawl Chawnpui a ni.

Semifinal hnuhnung zawk hi December 19, Thawhlehni zan dar 8:00-ah khelh a ni dawn a, Mizoram Police leh Chhinga Veng te an inhmachhawn dawn. Zonet chuan semifinal leh final inkhelte hi Zonet HD, Zawlbuk leh YouTube channel-ah a pe chhuak ang.

Duh thlang thei maw?

Chanmari FC hian league match hnuhnung ber an khelh hmain pakhatna dinhmun an hauh dawn tih an hre tawh a, palinaa awm team nen an inhmachhawn dawn. Chanmarians hmachhawn theih chu Aizawl FC, Chhinga Veng leh Chawnpui FC te an ni.

Coach Dampuia'n league match tawp berah Chhinga Veng lakah player khel ngai lo zawkte a luhtir a, AFC hmachhawn tura chak an mamawh avangin I League club hmachhawn an duh lo tih a lang. Chanmari hian Chhingcows lakah point khat hmu se, semifinal-ah Lalsangzuala Hmar hote bawk an hmachhawn dawn.

Mahse, Chhinga Vengin MS Dawngliana goal hmanga hnehna an chan tak avangin Chhingcows hi pathumnaah an chho a, Chawnpui FC an hmachhawn dawn ta. Chanmari hian champion ngei tumin player ṭha an la lut a, final kalkawng an duang a, an tum ram an thleng dawn em, tih chu zaninah a hriat ang.

Chutihrualin khelmuala player-te chet dan thlir chuan, hei hi thil awm dan zawkah a ngaih theih. Chanmari hian semifinal an luh tawh avangin player khel tlem zawkte an luhtir a, heng player-te hian chak tumin theihtawp an chhuah. Hei vang tak hian, Chanmari coaching staff Dampuia leh a thawhpuite hian eng team pawh hmachhawn an inhuam tiin a sawi theih bawk.

Champion a hlu

Chawnpui FC hian champion nawmzia an tem tawh a, team intluk tlan ber ṭuma an champion chuan kum zawnin an champion thei dawn. MPL-ah Aizawl FC chiah kum zawna champion thei an ni a, Chawnpui hian I League club record an nih rual theih bakah Chanmari FC champion zat an champion thei bawk.

Hei chauh hi a ni lo, coach Lalrindika Hmar tan MPL nomawi hmasa ber a ni dawn a, a hlu dawn. Chawnpui team hian theihtawp an chhuah tih chu a chiang a, ṭawiawmtu lam erawh an ṭha lo. Aizawl West lama MPL nomawi an hawn dawn a nih chuan Chawnpui tan player-te bakah a veng mipuite ṭawiawmna a pawimawh a ni.

MPL awm tirh aṭanga team ṭha zinga la tel ziah Chanmari FC hi Aizawl FC nen MPL zawng zawnga la tel vek thei awmchhun an ni. Club hlun Chanmari tan Chawnpuiin an record nih rual hi a tlawm thlak. Chanmari hian champion an duh tak tak a nih chuan an champion ṭuma player 12-na 'mipuite' kha an rawn inlar leh a ngai dawn. RG Stadium-ah tun hma anga Chanmari mipui an 'Shabash' leh thei a nih ngat chuan Chawnpui ai chuan final an hnaih zawk ngei ang.

Zuam chi loh Chawnpui

Chawnpui FC hi phase 1 zawh khan Chanmari hnuaiah chiah an awm a, round 14 zawhah palinaah an awm. Team pahnihah Chanmari player-te hi an lar zawk ngei a, team angin an ṭha zawk em, tih erawh chhan har tak a ni.

Tun hnai Mizo coach zinga ṭhang duang ber Lalrindika Hmarin Chawnpui hi a enkawl a, a hman thiam player a lak khawm an nih avangin Rindika mitah chuan Chanmari aiin an ṭha zawk ang.

Santosh Trophy-ah Chawnpuiin player pahnih chiah an thawh a, Vanlalthanga leh Laltluangliana te chauh an tel. Mahse, Chawnpui hi team intluk tlang ber, position tinah ṭhat vutna nei si lo a, kil tinah an ṭha tih nemnghehna a ni zawk.

Goalkeeper John Lalruatfela hi NE Olympic-a best goalkeeper kha a ni a, tlarhnungah MPL best defender ni lai Lalruatfela leh Lalhmangaihsanga te an inkawp. Mual sirah Tluangliana leh Joseph Lalmuanawma te an awm. Tlarhnunga player palite an khelh ho tam avangin Mizoram striker Lalkhawpuimawia ven pawh an châk tawh khawp ang.

Midfield-ah Peter Lalrinhlua, Lalruatfela (RF-a), Lalbiakzuala leh Vanlalremkima te an awm a, heta ṭang hian pathum an lut dawn. Mual sirah goal li khung tawh Vanlalthanga bakah C. Ramnunpuia leh K. Lalrosanga te an awm. Thanga hian phase 2-ah inhliam vangin minute 45 chauh a khel a, goal khat a khung hman tho.

Tlarhmaah Malsawmzela (Valpuia) leh David Lalchhuanawma te an awm a, Futsal-a India international David Laltlansanga (Avida) awm hnuah squad a chhah sawt. Dampuia ang thoin Rindika'n duh thlan tur a nei a, Chanmari khelh dan mila an khelh dan tur a duang dawn bawk. Hei chauh hi a ni lo a, Chawnpui pawh hian Mizoram Police aiin Chanmari hmachhawn hi an duh zawk!

A ṭha rual awmna Chanmari

Chanmari FC inkhel en a châkawmna chu player ṭha rual awm khawmna a ni a, an player bihchian hian an club hruaitute inpekna a fakawm. Hetiang ang player ṭha an nei chunga ṭawiawmna ṭha an dawng tawk lo hi a mak zawk!

MPL hmasa ber best player R. Laldanmawia an kawl a, captain Lalrinchhana Tochawng hi MPL best player ni lai a nih bakah MPL4 best defender a ni. Goalkeeper Zothanmawia hi MPL7 best goalkeeper a ni a, coach Laldampuia Tochhawng hi MPL5 top scorer a ni bawk.

Santosh Trophy group stage-a India ram puma top scorer ni thei Lalkhawpuimawia (Mapuia) an nei a, season liam taa Chawnpui FC champion puitu Laltlanzova an kawl. Zozoa hi Inter Village Football-a Champhai Kanan FC champion puitu kha a ni. Midfield-ah Manipur aṭanga an lak Thanglalven Gangte leh Sialhawk tlangval Crespo Vanlalhriatpuia te an nei a, Mizoram tana Santosh Trophy-a tel Lalthangliana (AB-a) te an kawl.

CYMA Football 2023-a Tlangnuam goal khung khawl Vincent Lalduhawma an nei a, Mapuia thlawp turin tawnhriat nei ṭha Lalrammuanpuia (Apuia) leh hmabak nei êng Rohlupuia (Mapuia) te an awm.

Tlarhnungah thui tak thleng tura theihna nei Ramngaihsanga, Lalpianthanga leh Zohmingsanga te an nei a, Mizoram team-a rinrawl Lalmawizuala an la kawl cheu. Dampuia hian duh thlan tur a ngah a, duh thlan thiam pawh a har dawn.

Tualchhung football-ah chuan Aizawl FC-in an duh an thlang a, an lak theih loh chu Chanmari FC-in an chang an ti ṭhin. Mahse, Danmawia, T. Mawia, Khawpuimawia leh Zozoa te hi chu Aizawl FC tan pawha itawm tak vek an ni a, hei vang tak hian Chanmari FC hi 'a ṭha rual awmna' tiin a sawi theih.

Head to head

MPL10-ah Chanmari FC table chung berah awm mah se head to head-ah Chawnpui FC an tluk lo. Round 11-ah Chawnpuiin Chanmari FC 2-0 a an hneh avangin coach K. Malsawmkima'n a hna a chân phah.

Laldampuia'n Chanmari hi match thum chauh a la enkawl a, vawi hnih chakpuiin vawi khat an chak lo. Chanmari hneh pahnih hi table hnuai lama mi Electric Veng FC leh FC Venghnuai te an ni a, Chawnpui lakah Dampuia'n fiahna a hmachhawn dawn.