Arteta-a'n thiam a chang

Arsenal manager Mikel Arteta chu Newcastle United an hneh loh ṭuma an ṭawngkam mawi lo vangin thubuai siamsak a ni a, mahse Football Association (FA) hnuaia zir bingtu Regulatory Commission chuan hrem ngai an ti lo.

St James' Park-a an inkhelh ṭum khan Gunners hi 1-0 in an chak lo, goal an chhuah danah Areta a lawm lo - Magpies lamin goal an khung hmain vawi thum ngawt dan an bawhchhe ngeiah a ngai, hei vang hian video assistant referee (VAR) thutlukna chu na takin a sawisel.

Spanish manager hian VAR thutlukna chu atthlak leh mualpho thlak a tih thu a sawi, a hnuah FA chuan a thil sawi avang hian thubuai a siamsak a ni. Mahse, a ṭawngkam leh chet dan hi zirchian a ni - Spanish ṭawngkam a hman chu English nen a khawh tum a inang chiah loah an ngai.

North London club hian Magpies laka point an hloh bakah Aston Villa an ngam lo leh tawh a, champion an tumna Premier League hmahruaitu an nihna pawh an hloh leh tawh - tho chhuak tur erawhin an tan kawng a la inhawng zau hle thung.

Zanin dar 7:30 hian Brighton an mikhual dawn a, an chak a nih chuan hmahruaitu an ni lailawk leh ang - Pathianni zana Liverpool leh Manchester United inkhel result a zirin an dinhmun erawh a la danglam leh thei dawn a ni.

Kar laihawlah khan Gunners hian Champions League an khel a, an player ṭha tam zawk hahchawlh tir chungin PSV nen an inhnehtawk, zaninah chuan an ṭhat dan berin an inrem leh thei tawh ang.

Arteta tana chanchin lawmawm turin Thomas Partey chuan training a zawm tawh. Partey hi a inkhel thei a nih chuan Declan Rice nen pawha dingkawp thei tura ngaih an ni a, hliam vanga a inkhelh tam loh vang erawh chuan rinrawla neih nghal a harsa mai thei.