Zaninah MPL : Project Veng Vs Chawnpui FC

Zote Toyota MPL10-ah zanin dar 7:30 hian RG Stadium-ah Project Veng FC leh Chawnpui FC te an inkhel dawn. MPL champion lai Chawnpui hian semifinal ticket an la nei lo a, chutihrualin an khelh hmabak pahnih Project Veng leh Electric Veng te hi table hnuai lama mi an nih avangin an dinhmun a ṭha letling.

Chawnpui khingpui tur Project Veng hian Aizawl FC 2-1 in an hneh lo a, coach Lalrindika Hmar hoten AFC kim lo hneh theih team hi hneh ve ngei an tum dawn. Mahse, Project Veng coach Lalrammawia (Patea) hian an khingpuite mil zela player khelh dan a siamrem ṭhin avangin zuam ngawt a rem lo ang.

Project Veng hian 'Bus an park' a nih ngat chuan Chawnpui FC tan goal khung a har dawn a, Rindika'n game plan pahnih tal chu a neih a ṭul dawn. Chawnpui hian an match hnuhnung bera Chhinga Veng an hneh loh avangin dinhmun hlauhawmah an la awm a, Project Veng lakah attacking game an khel dawn.

Chawnpui midfielder Peter Lalrinhlua leh Project Veng midfielder Lalnuntluanga (Nununa) te chu en bik tur an ni ang a, inkhel tur hi coach inbeihna tiin a sawi thei bawk. Coach Rindika pawh hian khingpui milin player a rem ṭhin a, tualchhung foobtall ngainatute tan coach-ten player an rem dan leh an khelhtir dan chu zir tham a tling ang.