Steven Gerrard-a'n kum 2011 hnua a vawi khat nan Rangers chu league nomawi chawipui tum mah se a beiseina hi a thamral dawn niin a lang a, hmahruaitu Celtic chu point 10 ngawtin an phak tawh lo. 

Nilaini zan Scottish Premiership inkhelah Rangers hian 1-0 a hma an hruai reng hnuin Kilmarnock chu 2-1 in an ngam lo a, an elpui ber Celtic chuan 5-0 in Hearts an sawp thung. 

Celtic-in hnehna an chan avangin table chung berah point 10 ngawtin hma an hruai fal tawh a, an hnuai chiahah Rangers an awm. Hriat tel tur erawh Steven Gerrard enkawl team hian match khatin an khel tlem zawk. 

Gerrard chuan, "Ka naute hian league nomawi chawi turin rilru huaisen tak an nei emaw ka lo ti ṭhin a, ka rin ang a lo ni lo," tiin a player-te a dem a, Liverpool legend a lawm lo hle. 

Rangers vanduaina 

Kilmarnock khelmualah Rangers-in goal khung turin hun an mamawh rei lo a, Scott Arfield chuan minute 32-naah mawi zetin goal hmahruai hi a khung. 

Steven Gerrard-a'n chak loh a inring lo. Mahse, hun tawp lam minute 13 chhungin Stephen O'Donnell leh Eamonn Brophy ten mualneitu team tan goal an rawn khung a, an chak daih!

Rangers tan striker chhuanvawr Alfredo Morelos a hmuhnawm a, mahse Colombia international vanneih zan a ni lo - chance ṭha vawi tam a hlah a, a goal khung chu foul vangin pawmsak a ni lo bawk. 

Gerrard-a enkawl team hian an league match hnuhnung panga aṭangin point sarih chiah an nei thei - vawi hnih an chak a, vawi khat draw neiin vawi hnih an tlawm. 

Stevie G beiseina a chuai

Rangers-in chak tura ngaih an nih laiin hnehna an chang zo ṭhin lo a, Gerrard a insum lo. Liverpool captain hlui chuan, "Tun hnai kar li - nga chhung hian ka nauten minti beidawng a ni. 

"Chutihrual chuan he player-te kaihruaitu ka nih avang hian mawhphurhna pawh ka nei ve tho a, ka thiam loh pawh a ni ve tho. Kan hmabak a hautak ta hle a, midang kutah kan innghah tel a ṭul ta," a ti. 

Rangers tlawm laiin Celtic-in goal nga an khung a, Olivier Ntcham, Christopher Jullien, Callum McGregor, Ryan Christie leh Jozo Simunovic ten goal khat ṭheuh an khung. 

Celtic hian 5-0 in Hearts an hneh a, December-a Rangers laka 2-1 a an tlawm hnu khan league match ruk khel leh tawhin an tlawm miah lo - nomawi a hnai.

Share this Post