KHAWTHLIR

Synod inkhawmpui

Synod inkhawmpui vawi 100-na chu zanin hian Mission Veng Kohhran biak-inah ṭan a ni dawn a, December 10, Pathianni zanah a ṭiak ang. Synod inkhawmpui hi Mission Veng Pastor Bialin an thleng dawn a, zanin inkhawmah Synod Moderator-in kohhran chanchin tlangpui a sawi ang. Naktuk Nilaini aṭanga December 9, Inrinni thleng rorel a ni ang a, Pathianniah pastor nemngheh leh probationary pastor dahngheh inkhawm neih a ni ang.

CEO pisa lâwm

Mizoram Chief Electoral Officer pisa chuan thuchhuah siamin, Mizoram Legislative Assembly General Election 2023-a vote tlate tluang tak leh boruak muanawm tak hnuaia chhiar zawh a ni ta chu lawmawm an tih thu an tarlang. Inthlan muanawm leh felfai neih a nih theih nana theihtawp chhuahtu thuthar thehdarhtu te, MPF leh tlawmngai pawlte bakah, inthlan tihlawhtlingtu mipui, candidate-te leh political party-te chungah lawmthu an sawi bawk.

First Charity Art Exhibition

Noah’s Foundation School chuan nimin khan Chaltlang Dawrkawna an sikulah First Charity Art Exhibition an buatsaih a, Bishop Stephen Rotluanga'n a hmanpui. Exhibition-ah hian naupangte kutchhuak 512 phochhuah a ni a; art work-te hi mipui lei theih tura phochhuah niin, heng aṭanga sum hmuhte hi ṭanpui ngaite hnenah hlan tura ruahman a ni. Bishop Stephen Rotluanga chuan, naupangte chu an inpekna fakin, an talent-te tipung tur leh upbo mai loa chhawm nung zel turin a fuih.

Sorkar thar lakluh Hun la tifel lo

Mizoram sorkar thar tur hriat tawh mah se, sorkar thar tur lakluh hun hi tihfel a la ni lo. Tun thla tir khan addl. chief secretary M Sathiyavathy hoin sorkar thar lakluh hun tur hi rel a lo ni tawh a, a hun tur erawh tihfel a la ni lo. Ruahman ang chuan sorkar thar hi Raj Bhavan-ah lakluh a ni dawn a, Governor-in Chief Minister leh minister lakluh turte thutiam a sawi tir anga, Chief Secretary-in official lam aṭanga sawi tur pawimawhte a puang ang.