Season thar atan Hamilton a inpeih

Lewis Hamilton chuan nikum lam nena khaikhin chuan a taksa dinhmun a ṭhat zawk thu a sawi a, car intlansiakna sang ber Formula 1 season thar hmang turin a inpeih tawk tawh thu a sawi bawk.

Mercedes chuan tun kar tawp hian an car thar enchhinna an nei dawn, world champion vawi ruk ni tawh Hamilton chuan an car thar nen a vawi sarih nana F1 title lak a tum dawn a ni.

Kum 35 mi Hamilton chuan, "Season hmasa ṭan dawn khan ka rih zawng chu 78kg a ni a, tunah chuan 73kg ka ni. Thau chhia paih ṭhen tur ka la nei a, tihrawl ka siam belh bawk ang," tiin rilru mai bakah taksa lam inbuatsaihna a neih ṭhat tawk thu a sawi.

Britain tlangval hian season dang anga hun a hmang ṭha leh a nih chuan Michael Schumacher record (91 wins) nih rualin Grand Prix-a chak hnem record siam theihna hun a nei dawn, world title lak hnem lamah pawh a champion leh a nih chuan German legend hi a nihrual bawk ang.

Tunkar tawp hian Mercedes hian Silverstone tlan kawngah enchhinna an nei dawn. February 19 aṭangin Barcelona lamah an elpui tur team dangte nen pre season test a nei chhunzawm ang - inelna tak Australian Grand Prix chu March 15 hian tlan a ni dawn.



Share this Post

Login to comment
No Comments