Pathian leh ram mipuite chungah lawmthu kan sawi - ZPM President

Mizoram inthlanpuia sorkar siam tura chak ta ZPM party president Lalliansawta chuan, inthlanpuiah an chak chu an lawm tak zet a, Pathian leh ram mipui chungah lawmthu a sawi.

ZPM chuan nimin chawhnu khan an party pisaah lawmthu sawina inkhawm an hmang a; ZPM president Lalliansawta chuan, "ZPM-in hnehna ropui tak mai kan chang hi kan lawm tak zet a, Pathian leh ram mipuite chungah lawmthu kan sawi tak meuh meuh. Kum ruk chauha upa party kan ni a, kum 60-a upate pawh kan lehpêl thei hi a ropui hle. Kan phû rêng vang loin Pathian remruatah kan ngai a, roreltu hi Pathian ruat an ni a, hun a tihah roreltu a siam mai a ni," a ti.

Lalliansawta chuan, MLA-a tling zawng zawngte duhsakna sang ber a hlan a, tling zo ve ta lote chu an kal zelna turah duhsakna hlànin, ram tan theihtawp chhuah tlang turin a sawm a ni.