Fabian Ruiz-a goal mawi hmangin Napoli chuan Inter Milan 1-0 a hnehin Coppa Italia first leg-ah 1-0 in hnehna an chang a, final lut turin an dinhmun a ṭha ta zawk; March 5 hian San Paolo Stadium-ah second leg an khel leh ang.

Juventus leh AC Milan ten nizan khan semifinal an khel ve bawk, result erawh an hre hman lo. Coppa Italia hi May 13, Nilaini hian a hmawr bawkna neih a ni ang - champion lai Lazio chu kuminah quarterfinal paltlang loin an tla tawh.

Ruiz-a goal

Nilaini zan San Siro-a inkhelah team pahnih an inkhing tawk viau a, goal pawh kan hmu har. Second half minute 57-naah Fabian Ruiz chuan box pawnah inringtawk taka ball a tlanpui hnuah mawi takin a pet kum lut, keeper Daniele Padelli dan phak lohin mawi zetin a lut.

Gennaro Gattuso-a'n damkawr Lorenzo Insigne leh Kalidou Koulibaly te inkhel bul ala ṭantir ngam lo a, tlarhma leh hnunglam an nih tur angin an la ni tawk lo. Chutih rualin an vanneih ṭum chu ni se Dries Mertens leh Arkadiusz Milik ten an goal hnihna khung theihna an nei a, mahse an vannei tawk lo.

Napoli manager Gattuso chuan, "Hei hi Napoli dik tak chu a ni, ka naute khelh danah ka lawm hle. Hna kan la zawh loh avangin lawm lutuk tur erawh a la ni lo, a chanve chauh kan la zo," tiin a la ṭawng uang duh rih lo.

Italian manager chuan sawi zawmin, "Inter Milan te ang team ṭha kan hmachhawn a nih chuan fimkhur a ngai, zah tak chung siin kan hlau tur erawh a ni lo. Inringtawk taka ball kan inpe kual thei a nih hi chuan result ṭha chu a rawn thleng mai," tiin a sawi.

Conte a ngeiawm!

Inter Milan manager Antonio Conte chuan, "Gennaro Gattuso ka lawmpui, he hmunah hian Napoli chu an goal venghim turin a rawn hruai a ni," tiin a elpui manager Gattuso chu player a nih laia a khelh tawhna San Siro-ah dawih zawk ni chunga lenglutah a puh.

Conte chuan sawi zawmin, "Dries Mertens khan Marcelo Brozovic a veng tawp, hei hian inkhel chanchin a sawifiah viau. Inkhel hautak kan hmachhawn zawh chiah avangin ngai kan la awh lo. Chutihrualin inkhel a la zo lo tih erawh hriat a ṭha," a ti.

Inter hian Milan Derby-ah AC Milan lakah goal hnih an phurh hnuin 4-2 in an tho chhuak thei a, tunah pawh Napoli lakah hniam zawk ni rih mah se an la beidawng lo ang tih a chiang. Serie A hmahruaitu hian hnehna chan ngei tumin si ruk lain San Paolo an pan ang.

Nerazzurri hi Conte hnuaiah insiamṭha viau mah se an ṭhat dan berin an la inrem fuh tawk lo niin a hriat, midfielder ball thiam Christian Eriksen chu Milan an hmachhawn ṭum ang bawkin bench aṭanga dah a ni. Denmark international hi a inbenbel hunah chuan Inter inkhel timawitu bakah goal nawrtu pawimawh a nih ngei a rinawm.

Share this Post