Party dangte'n ZPM duhsakna an hlân

Mizorama political party hrang hrangte leh party hruaitute chuan, sorkar siam tura inthlanpuia chak ta ZPM party chu inthlan hmaa an thil tumte tihlawhting turin duhsakna an hlàn.

Mizoram Pradesh Congress Committee (MPCC) president Lalsawta chuan MLA inthlanpuia ZPM leh MNF party aṭanga MLA atana thlan tlinte a lawmpui thu sawiin, ZPM chu Mizoram mipui zawng zawngin a zár an zo theih tur sorkar ṭha an siam ngei theih nan duhsakna a hlan.

Nimina Congress Bhavan-a inkhawmah Lalsawta chuan, Congress party aiawha Lawngtlai West biala thlan C Ngunlianchunga an lawmpui thu leh an chhuan thu a sawi a, "Mizoram mipuiin duhtaka an thlan MNF leh ZPM MLA-te ka lawmpui a, sorkarna siam tur ZPM chu Mizoram tana sorkar ṭha tak siam turin duhsakna ka hlan a, Mizoram mipui zawng zawngin a zár an zo theih tur sorkar ṭha an siam ngei theihna turin duhsakna kan hlan a ni," a ti.

Lalsawta chuan, theihtawpin Congress party mipui an ṭang tih sawiin, "Kan hun a la her rih lo a ni. Min duhsaktu Mizoram mipui chungah lawmthu ka sawi a, Congress mipui, kan candidate-te thawhrimna leh inpekna, an huaisenna zawng zawngah lawmthu ka sawi," a ti a; an duh ang result nei lo mah, ram leh hnam tana thawhnaah rálbáng thei an ni lo a, a hma aia nasa zawka an thawh a ngaih thu a sawi.

MNF party chuan thuchhuah siamin, Mizoram mipui duhthlanna hmanga thlan tlin sorkar thar a awm dawn ta tih an tarlang a, "Sorkarna siam tur ZPM-te kan lawmpui a, Mizo mipuite'n beiseina nena an thlirte tihlawhtling tur leh ṭhahnemngai taka thawk turin duhsakna kan hlan," an ti.

MNF chuan, an candidate-te duhsak taka lo vote-tute chungah lawmthu an sawi a; MNF candidate thlan tlinte leh party dang candidate thlan tlin zawng zawngte an lawmpui thu te, MNF MLA-te chu eptu MLA ṭangkai tak ni tura an duhsak thu te, tling zo ta lote thinlung taka an tawrhpui thute an tarlang.

MNF chuan, "Sorkar thar hmalakna ngun taka thlirin, Mizoram leh hnam tan theihtawp chhuahin hna kan thawk chhunzawm zel dawn a ni," an ti.

BJP, Mizoram Pradesh chuan thuchhuah siamin, inthlanpuia an candidate pahnih - Dr K Beichhua, Siaha bial leh K Hrahmo, Palak bialte an lawmpui thu an tarlang a, "Sorkarna siam tur, ZPM party-te chu kan lawmpui hle a, kalphung thar an intiam ang ngeia mipuite'n kan hmuh theih nana hma an lâk theih nan duhsakna kan hlan a ni," an ti.

Prime minister scheme hrang hrangte chu a nihna ang taka hman a nih theih nana hma la turin ZPM sorkar chu an ngen tih BJP chuan an tarlang bawk.

Aam Aadmi Party pawhin thuchhuah siamin, MLA atana tling tharte an lawmpui thu leh sorkarna siamtu tur ZPM-te an lawmpui thu an tarlang a, "Mizoram tana thil ṭha ti turin duhsakna kan hlan a, an thil tum, mipui hmaa an intiamte tihlawhtling turin kan beisei tlat a, kan lo thlir dawn a ni. Mizoram mipui tan ṭha taka an tih theih ngei kan ring tlat a ni," an ti.