Sorkar lak luh ní-ah ni 100 chhunga ngaih pawimawh tur puan a ni ang - ZPM CM Candidate

ZPM chief ministerial candidate Lalduhoma, Serchhip bial aṭanga MLA atana thlan tlin chuan, ni 100 chhunga an ngaih pawimawh turte chu sorkar thar lâk luh ní-ah an puan tur thu a sawi.

MLA atan thlan tlin a nih hnua thuthar thehdarhtute zawhna chhangin Lalduhoma chuan, campaign laiin bial dang a vilpui avangin Serchhip bialah chawlhkar khat ṭha vel chauh hun a neih thu a sawi a, "Kum 2018 leh by-election-ahte Serchhip bialah thlan tlin ka ni tawh a, tunah a ṭum thumna atan hnehna min chantirtu Serchhip bial mipui chungah lawmthu ka sawi tak meuh a ni," a ti.

Lalduhoma chuan, thlan tlin a ni chu an party chakna ni loin bial mipuite chakna vang a nih thu sawiin, "Opposition MLA anga nêkbehna kara harsa taka kan inenkawl kha vawiinah chuan sorkar chakna nen kan inenkawl ve thei tawh dawn. Kan hmalak dan tur chu kan VC te, NGO hrang hrangte leh party-te nen kan la sawi khawm ang," a ti a, sawihona aṭanga ṭul an tih ang angin hma an lak chhoh dawn thu a sawi.