CM Zoramthanga'n bànna a thehlut; "Kan tlâk chhan pui ber anti incumbency"

Chief minister Zoramthanga chuan nimin tlai dar 4 khan Governor Dr Hari Babu Kambhambati hnenah chief minister aṭanga bànna a thehlut. Zoramthanga chuan, an tlak chhan ber chu sorkar lai ninna vang a nih thu a leh, MLA aṭanga a tla chuan a hun kal zel turah nghawng a neih dawn loh thu a sawi.

CM aṭanga bànna a thehluh zawha thuthar thehdarhtute chhángin Zoramthanga chuan, "Kan tlâk chhan lian ber chu Covid-in kan economy leh thil dang zawng zawng tichhia a, harsatna naménloah kan lut a, chu chu eptute'n advantage-a lain, an fel loh vang an tia, chu chu mipuiah kan inhrilhfiah seng tawh si lo. Chuvangin, Covid harsatna lian lutuk min pek kara kan sorkarah hian sorkar lai duhkhawp tâwk lohna, anti incumbency hi kan tlak chhan pui ber a ni," a ti.

MNF-in MLA 27 aṭanga 10 chauh an nei chu an beisei dan a nih leh nih loh zawhna chhangin Zorama chuan, "Heng em em chu kan inbeisei lo a, boruak a ṭhat chuan sorkarna siam leh theihte pawh kan inring," a ti a; "Mi rilruah, a bik takin khawpui lamah, district headquarters lamah hetianga sorkar ding lai paihthlak duhna, thlâk hrim hrim duhna, MNF ni lo, Congress ni lo, khamia tuihal huam huamna kha kan hneh lo a ni...Tu mah han ding zo kan awm lo a, sorkar thlak hrim hrim duhna a awm a ni," tiin a sawi.

MLA aṭanga a tla chuan a political zin kawng kal zel turah nghawng a neih dawn leh dawn loh zawhna chhangin MNF President chuan, "Kan tla tam tawh em mai a, nghawng a nei ngai chuang lo. Kum 1986 aṭang khan inthlanah kan tling a, kan tla a, a dawtah chuan a aia chakin ka chhuak leh ṭhin. Chuvangin, MNF movement-ah leh MNF kal danah leh keimahah, Pathian zara kan dam chuan eng mah nghawng a nei lo ang," a ti.