Chelsea player tur Ziyech

Chelsea chuan Ajax aṭangin winger Hakim Ziyech an lalut dawn a, nipui bazar a inhawn hunah pound maktaduai 38 sengin an lei fel ang - tunah inremna siam tawh mah se season thar aṭangin an chhawr dawn chauh tihna a ni.

January bazar inhawn hun lai khan Blues manager Frank Lampard chuan kum 26 mi Ziyech hi a lo ngaihven tawh. Mahse, Ajax lamin Eredevisie title an beisei san lai a nih avangin an chhuah phal rih lo, tunah erawh club pahnih an inrem thei ta.

Premier League club hi player lalut thei loa hrem an nih hnuah Morocco international hi an lei hmasak ber a ni, thlasik bazar lai khan Paris St-Germain striker Edinson Cavani leh Napoli forward Dries Mertens te nen pawh sawizawm an lo ni tawh.

Blues legend Lampard-a'n player thar an lak loh avanga a lawm loh thu a sawi hnu lawkah club lamin an manager duh an ti hlawhtling, winger Ziyech hi nikum November thla a Champions League an khelh ṭuma an hmachhawn tawh a nih avangin a theihna an hre fuh.

Chelsea nen an inkhelh ṭumin Ziyech hian corner flag bul hnai lawk aṭangin freekick kum mawi zetin a pet a, goal ban a per hnuah keeper Kepa Arrizabalaga luah fuhin goal-ah a lut - theihna nei sang leh ball pet thiam bik a ni.



Share this Post

Login to comment
No Comments