Mizoram Assembly inthlanpuiah ZPM-in seat 27 lain an chak

Mizoram State Legislative Assembly pakuana atana general election-a vote tlate chu nimin khan district khawpui tinah chhiar a ni a; Zoram Peoples Movement (ZPM) party-in seat 27 an la a, sorkar siam turin an chak. Sorkar lai MNF party chuan seat 10 an la thung.

Assembly general election vote chhiar hi zing dar 8-ah ṭan a ni a, district 11-a counting centre 13-ah chhiar a ni a, constituency 40 tan counting hall 40 leh electronic voting machine (EVM) atan counting table 306 leh postal ballot tan table 52 siam a ni. Zing dar 8-ah postal ballot chhiar a ni a, zing dar 8:30 aṭangin EVM an chhiar ṭan a ni.

Sorkarna siamtu ZPM party chuan kum 2018 MLA inthlanpuiah bial pariat an la a, Lalduhoma bial pahniha a tlin avang leh thihna avangin MLA inthlan dawnah chuan MLA paruak chiah an nei tawh. Tun ṭum inthlanah hian seat 27 an lak avangin bial 21 an lâk belh a ni.

Rorel lai MNF party chuan kum 2018 MLA inthlanah constituency 26 lain, by-election-ah seat pahnih an lak belh a, seat 28 an nei. Tun ṭum inthlanah chuan seat 10 an la a, inthlan hmasa leh a hnua an lak belh nena chhût chuan term hmasa aiin MLA 18-in an nei tlem zawk.

Kum 2018 MLA inthlana seat panga latu Indian National Congress (INC) chuan tun ṭum inthlanah hian bial pakhat chiah an la a, seat pali an hloh. MLA pakhat chiah neia inthlan hmachhawn BJP chuan tun ṭumah hian bial pahnih an la a, MLA pakhat an neih belh a ni.

Inhnehna sanna ber chu Aizawl North-II bialah niin, ZPM candidate Dr Vanlalthlana'n amah hnaih bertu MNF candidate Vanlalsawma chu vote 6,507-in a hneh. Inhnehna tlemna ber chu Lengteng bial a ni a, ZPM candidate F Rodingliana'n amah hnaih bertu MNF candidate Dr L Thangmawia chu vote 47-in a hneh.

Chief minister ni lai leh MNF president Zoramthanga chu a bial enkawl lai Aizawl East-I ah a tling zo lo a, vote 2,101-in ZPM candidate Lalthansanga a hneh lo. MPCC president Lalsawta pawhin Aizawl West-III bialah ZPM candidate VL Zaithanzama chu vote 4,833-in a hneh lo a, MNF candidate K Lalsawmvela hneh lo bawkin, pathumna a ni.

MNF sorkar liam taa minister zingah Tuivawl bial aṭanga thlan tlin Lalchhandama Ralte leh Hachhek biala thlan tlin Robert Romawia Royte te chu tling nawn awm chhun an ni.

Mizoram Legislative Assembly inthlanpui 2023-ah hian MLA ni lai (kum 2018 inthlan leh a hnu by-election-a thlan tlin) zingah tling nawn 15 an awm a; tun hmaa MLA lo ni tawh ṭhin tun ṭuma thlan nawn pakhat - Lalthansanga, Aizawl East-I a awm a, a bak zawng chu MLA atana an tlin vawi khatna vek a ni.

Thlan tlin zingah kum 73 mi Lalduhoma a upa ber a, kum 32 mi Baryl Vanneihsangi leh Jeje Lalpekhlua, ZPM ve vete an naupang ber thung.