Vanglaini - Match hautakin Atletico a hmuak

KHAWTHLIR

Bungrua hlân

Tuirial constituency bialtu MLA Andrew H Thangliana chuan a bial chhunga YMA branch hrang hrang hnenah February 12, Nilaini khan bungrua/hmanrua chi hrang hrang a hlân. MLA hian a biala YMA branch zawng zawng hnenah bawngtuthlawh, suahdúr, thîrtiang, hruizén leh silpauline pek turin a ruahman a, a thawh khatna atan Nilaini khan Thingdawl, Bualpui, Kawnpui leh Hortoki-a YMA branch-te hnenah an hlan a, nimin khan Zanlawn, Serkhan, Lungdai YMA-te hnenah an hlan leh bawk.

Lengpui-in phal lo

Lengpui khuaa tlawmngai pawl hrang hrangte chuan thuchhuah siamin, an khaw ram chhungah sa pêl, sava veh leh dan phal loh hmanraw hmanga luia nungchate man an remti lo tih an puang. An thuchhuak pawisa loa ti lui man an awm chuan thuneitute hnenah an pek zel tur thu an tarlang.

Nupui sât hlum

K Lalthanṭhuama (49), Champhai Vengsang chuan February 12, Nilaini tlai khan a nupui Lalnunziri (48) a sât hlum. K Lalthanṭhuama'n police-te hmaa a sawi danin, a nupui nen an inhau a, a nupuiin a chháng lêt chu thinrimin chempui a la a, a sât a ni. A nupui a sah hnuah K Lalthanṭhuama chu in aṭangin a tlân chhuak a, mipuiin an man hnuah police-in an la a, jail-ah dah a ni. Lalnunziri hi damdawi-in panpui a nih hnuah a hliam tuar loin a thi. K Lalthanṭhuama leh Lalnunziri te hian fa pasarih an nei a ni.

MLA-in hmanpui

Nimin khan Kulikawn YMA Hall-ah MUP Aizawl South-II Area Conference vawi 20-na neih a ni a, Champhai North bialtu MLA Dr ZR Thiamsanga, Health & Family Welfare Board vice chairman-in a hmanpui. ZR Thiamsanga chuan, upate an hlut thu sawiin, upate chu an thiamna leh tawnhriatte ram leh hnam tan pe chhuak zel turin a sáwm a, "Sorkarin The Mizoram Maintenance and Welfare of Parents and Senior Citizens Rules, 2014 hnuaiah upate tan theihtawp a chhuah zel dawn a ni," a ti.

Innovative challenge

Entrepreneurship Development Centre (EDC) leh Lawngtlai College-te chuan nimin khan Lawngtlai College auditorium-ah District Innovative Challenge on Business Solution to Sustainable Development Goals an buatsaih. He hun hi Lawngtlai College principal T Thang-

ṭhuama'n a kaihruai a, EDS project coordinator Lalrinnunga'n EDS hmalaknate a sawi. Innovative Challenge-ah hian a ti ṭha ber team-in Rs. 30,000, pahnihnain Rs. 20,000, pathumnain Rs. 10,000 an dawng dawn a ni.

Home Science Conference nei

Mizoram Home Science Association chuan nimin khan Zirtiri Residential Science College-ah General Conference vawi khatna an hmang a, Higher & Technical Education deputy secretary HL Dingliana'n a hmanpui. He hunah hian Mizorama Home Science zir chhuak tawh mi ṭhahnem tak an tel a ni. Zirtiri Residential Science College-ah hian kum 1980 aṭangin Home Science zirna hawn a ni.

DAWNTISEI

Match hautakin Atletico a hmuak

Season duhawm lo hmang mektu Atletico Madrid chuan zanin dar 1:30-ah league match an khel dawn a, anmahni ang thoa Champions League khelh tum Valencia an lenchilh dawn.

Atletico hian beisei an phak loh avangin table-ah palina dinhmun an luah pha ṭawk a, pangana Sevilla nen an point hmuh zat a in ang. Valencia hi pasarihna ni mah se Atletico an thlauhna chu point hnih chauh a ni a, inkhel hmuhnawm a beisei ngam.

Diego Simeone-a tan hna a hautak chho dawn chauh tih a lang - February 18 zanah Champions League last 16 group stage khel turin Liverpool an mikhual zui dawn a, Reds hmachhawn hmaa Valencia tum hi ṭawngṭai chhannaa chhiar thiam a harsa ang.

Atletico buaina chu

Inelna hrang hrangah match nga zet a zawna an chak loh hnuin Atletico hian kar hmasa khan Granada chu 1-0 in an hneh a, an nguai lutuk tur chu an inbeng harh.

Mahse, he team hi an buaina ngaiin a la kiamsan lo a, Kieran Tripper leh Joao Felix te chuan zaninah Valencia an hmachhawn theih a beiseiawm loh.

Chutihrual chuan player inhliam dang Diego Costa, Alvaro Morata, Santiago Arias, Jose Gimenez leh Hector Herrera te chuan dam lam an pan leh tawh a, Valencia laka chhawr tur erawh chuan a la hma vek mai thei.

Inlungrualna

Atletico Madrid thuneituten fan-te hnena hriattir an duh ber chu an inlungrualna a ni a, chumi lantir tur chuan Atletico players leh coaching staff-te chuan Nilaini tlai khan zanriah an kil ho.

Granada an hmachhawn hma khan Atletico players leh staff-te hian zanriah an kil ho tawh a, an chak zui - Atletico CEO Miguel Angel Gil Marin chuan a zawngchhang laklawh a, an ti leh ta a ni.

Atletico player leh staff-te zanriah kil hona hmun hi Madrid huam chhunga thingtlang khua Robledo de Chavela-a ni a, inlungrualnain eng chiah nge a hlawhchhuah zaninah a hriat ang.

Correa vs Rodrigo

August 2019 khan Angel Correa chuan AC Milan pan turin thutlukna a siam fel tawh a, Valencia striker Rodrigo Moreno chu Atletico Madrid nen an indawr thung - Rodrigo leh Atletico inbiakna a tlawlh a, Correa a chhuak thei lo zui.

Argentine forward Correa hian Atletico tan a pawimawhzia a pholan chhunzawm a, inelna hrang hranga match 27-a khelhah goal ruk khungin assist vawi ruk a nei bawk.

Rodrigo a danglam bik lo. Goal khung lamah season hmasa la phak lo mah se goal nga chu a khung tawh tho a, assist vawi 11 lai a nei thei bawk - Correa nena an intawng tur hi hmuh a châkawm hle.

Share this Post

Login to comment

No Comments