Al Hilal-in Ronaldo telna Al Nassr an hneh

Saudi Pro League-a inkhel ngaihven hlawh ber pawlah Al Hilal chuan 3-0 in Cristiano Ronaldo telna Al Nassr an hneh a, SPL-ah anmahni hnaih phak an awm meuh lo - match 15 khelh tawhah Al Hilal hi la tlawm loin, point 41 an hmu a, hma an hruai mek.

An hnuai chiaha awm Al Nassr-in an inkar sawr zimna remchang nei mah se, Riyadh derby-ah a tlawm zawkah an ṭang a, point 34 an nei mek - point sarih ngawtin an inthlau mek tihna a ni.

Al Hilal tan hian Fulham striker hlui Aleksandar Mitrovic chuan goal hnih ngawt a khung a, midfielder Sergej Milinkovic-Savic chuan goal khat a thawh ve bawk - hun pek belhah defender Ali Albulayhi chu hnawhchhuah ni mah se an tuar hman lo.

Al Nassr tan Cristiano Ronaldo leh Saido Mane ten inkhel bul ṭan mah se, khualmualah an team an chakpui zo lo a, tlarhnunga Aymeric Laporte awm chuan Al Hilal lakah goal a chhuah lohtir phah lo - goal thum ngawt an chhuah.

Al Hilal fan-ten, "Messi, Messi, Messi," ti chungin Ronaldo an au el a, a chhanletna tur goal a khung loh miau avangin Portuguese forward-in a theihnghilh lawk lo ang.