Milan an chak chiang

Serie A match li a zawna an chak zawh loh hnuah AC Milan-in league match hnih a zawnin hnehna an chang ve leh ta a, kar hmasa lama Fiorentina (1-0) an hneh hnuah Inrinni zan khan hnehna changin, an mikhual Frosinone chu 3-1 in an hneh.

Milan tan Luka Jovic, Christian Pulisic leh Fikayo Tomori ten goal khat ṭheuh an khung a, minute 82-naah Frosinone-in Marco Brescianini hmangin khung ve mah se awmzia a nei phak lo.

Zirtawpni zan khan Juventus chuan 2-1 in Monza an hneh ve bawk. Mikhual Juve tan Adrien Rabiot chuan minute 12-naah goal hmahruai a khung a, an chakpui mai dawna a lan laiin Monza tan Valentin Carboni chuan hun pek belhah si phurh a sut.

Carboni goal khung hun hi 90+1 a ni tawh a, point an insem mai a rinawm. Mahse, Federico Gatti chuan hun pek belh minute linaah Juve tan khung ve lehin, 2-1 in an chak zui.

Juve hian hnehna an chan avangin Serie A-ah hma an hruai mek a, mahse, nizan inkhelah Inter Milan-in Napoli an hneh chuan pahnihnaah an tla thla ang a, Inter-in hma an hruai zui ang - he thu buatsaih a nih lai hian result kan hre hman lo.