Lyon coach Grosso an ban

Ligue 1 table mawngphah lama talbuai lai Lyon chuan an coach Fabio Grosso an ban, kum 2024 thleng daih contact nei mah se match sarih chhung chauh team a enkawl hman tihna a ni.

Kum 46 ni Grosso hian French champion vawi sarih ni tawh hi a chakpui hleithei lo, Ligue 1 match vawi sarih a kaihhruaiah vawi khat chiah a chakpui.

September thla mai khan Laurent Blanc a thlak a ni a, chawlhkar 11 pawh a enkawl tling hman lo tihna a ni.

Lyon chuan Grosso hmun ruakah academy coach Pierre Sage a awm nghal tih an sawi a, chutihrualin French manager hi a nghet ni loin manager lailawk a ni phawt ang.

Ligue 1 club Lyon chuan thuchhuah siamin, “Olympique Lyonnais chuan Fabio Grosso leh a thawhpuite chungah lawmthu kan sawi, club tana an hnathawh leh theihtawp an chhuahna avangin an chungah kan lawm, an kal zelna turah duhsakna kan hlan,” an ti.