MPL club parukin kumin chhunga inelna zawh an duh

Mizoram Premier League club paruk FC Venghnuai, Project Veng FC, Electric Veng FC, Chawnpui FC, Chanmari FC leh Chhinga Veng FC te chuan inthurualin kumin chhung ngeia inelna zo turin MPL Board hnenah ngenna an thehlut.

Zote Toyota MPL10-ah round 10 khelh zawh tawh a ni a, league round pali bakah semifinal leh final te khelh tur a la awm. MPL Board-in fixtures a tihchhuah hnuhnun berah MPL zawh hun tur a la chiang thei lo.

Fixtures awm dan

Aizawl FC-in I League an khelh avangin MPL Board tan fixtures siam a harsa; December 14, Ninganiah round 14 khelh tur ni mah se AFC zin chhunga I League club khelh loh match thum chu round tawp ber zawhah khelh leh a ngai dawn.

Aizawl FC leh Mizoram Police inkhel tur chu December 18, Thawhṭanniah dah a ni a, Project Veng leh Aizawl pawh December 22, Zirtawpniah dah a ni bawk. I League club leh Electric Veng inkhelh hun tur tihchian a la ni thei lo.

Hemi a nih avang hian semifinal leh final khelh hun tur a la hriat loh a, kumin chhunga inelna zo tur chuan Krismas leh Kumthar inkarah khelh a ngai ang.

An thu thlen chu

MPL10 hi Santosh Trophy final round leh inthlanpui vangin thla khat chuang chawlh a ni a, inelna neih chhung a rei phah. Kuminah MPL Board-in harsatna an tawk a, an duh angin ground an hmu ṭha lo.

MPL club paruk chuan MPL Board harsatna tawh an hriatthiampui rualin an harsatna hriatpui ve an beisei. "MPL10 khelh hun rei lutuk hi club lam chuan kan tuar hle dawn. Min hriatpui ngei pawh kan ring. December chuan kai pawh kan beisei loh laiin January 2024 hial thlen ngai mai thei dinhmuna fixture a lo chhuak hi a hnuaia club-te hian kan huphurh takzet a ni. Player-te hlawh pek tur nei lo club kan awm nual dawn tih hi club ṭhenkhat chuan kan hmu tlang vek a ni.

"Hemi chungchang hi a rang lama min ngaihtuahpui a, December thla chawhma lam tala MPL10 hi zawh dan min ngaihtuahpui hram turin a hnuaia MPL club hrang hrangte hian kan ngen tak meuh meuh a ni," tiin MPL Board hnenah November 24, Zirtawpni zan khan an thlen a, kumin chhunga inelna zawh an duh thu leh an duh chhan chiang takin an ziak.

Engtin zel?

MPL-ah hian team pariat an awm a, MPL Board-a ngenna theh lut zingah Mizoram Police leh Aizawl FC te an tel ve lo. Police coach Lalbiaksanga Colney chuan, "Mizoram Police kan tel dawn chuan kan hotute thu lak a ngai a, thu kal chhung a rei deuh avangin kan hming hi a lang tel ve lo. Keini lam aṭang chuan harsatna kan nei lo a, kumina kan zo emaw nakkum zawh tur a nih emaw pawhin buaina kan nei lo a, chutihrualin MPL club-te harsatna tawh hi ka hriatthiampui khawp mai," tiin Vanglaini a hrilh.

Aizawl FC tan erawh I League leh MPL an khelh kawp avangin kumina inelna zawh an thlawp hi a rem lo a, phase 2-ah pawh match thuma point kua hmuh theih aṭanga point li chauh an hmuh chhanah pawh an fixtures hautak hi an puh thei ang. Kuminah inelna hi zawh tur a nih chuan Aizawl FC tan MPL-ah reserve player an chhawr a ṭul hial dawn a ni.

Vanglaini chuan hemi chungchangah hian MPL Board member a be nghal a, ngaihtuahna hun an la awm loh avangin MPL Board an la ṭhut khawm loh thu a sawi.